Taalie 31:3-14

³I naxa i sɛnbɛ fi ginɛ ɲaaxie ma, naxee fata mangɛe ralɔɛde. I naxa bira na ginɛ mɔɔli fɔxɔ ra.

⁴Mangɛ Lemuweli, a mu lanma mangɛe xa wɛni min. Beere xɔli mu lanma a xa mangɛ suxu,

⁵xa na mu a ra e nɛɛmuma nɛ e yɛtɛ xa sɛriyɛ ma, e fa tɔɔrɔmixi yanfa.

⁶Na minse mɔɔli xa so mixie nan yi, naxee na saya kira xɔn ma, alako e xa nɛɛmu e xa fe xɔrɔxɔɛ birin ma.

⁷Naxan wɛni minxi a nɛɛmuma nɛ a xa setareɲa ma, a mu ratuma a xa tɔɔrɛ ma sɔnɔn.

⁸I xa dɛtare xunmafala, i xa misikiinɛ mali.

⁹I xui ramini, kiiti sa nɔndi ra. I xa tɔɔrɔmixi nun setare xunmafala.

¹⁰Nde nɔma ginɛ fanyi sɔtɔde? A tide gbo diyaman bɛ.

¹¹A xa mɔri laxi a ra, a findixi harige fanyi nan na a bɛ tɛmui birin.

¹²A fe fanyi rabama a xa mɔri bɛ, a mu fe ɲaaxi yo rabama a ra a xa duniɲɛigiri kui.

¹³A yɛxɛɛ xabe nun gɛsɛ fute fenma, a nee rafalama sosee ra. Na wali rafan a ma.

¹⁴A luma alɔ yulɛ xa kunkui, a sa baloe fenma yire makuye a fa a ra.