Taalie 28:7-22

⁷Sɛriyɛ batula findixi di xaxili fanyi nan na, kɔnɔ wasatare tan a baba rayaagima nɛ.

⁸Mixi naxan a xa naafuli xun masama riba ra, a xa bannaya gbilenma nɛ kinikininte ma.

⁹Mixi naxan tondima a tuli matide sɛriyɛ ra, Ala mu a xa duba suxuma feo.

¹⁰Mixi naxan tinxintɔɛe ratantanma, a birama a yɛtɛ kan xa gantanyi nan kui, tinxintɔɛ tan fa kɛ fanyi sɔtɔde.

¹¹Banna mixi ɲɔxɔ a ma a xa lɔnni gbo, kɔnɔ setare xaxilima nɔma nɛ na kanyi ra.

¹²Tinxintɔɛe xun na rakeli, ɲama ɲɛlɛxinma nɛ, kɔnɔ tinxintare xun na rakeli, ɲama a nɔxunma nɛ.

¹³Mixi naxan a xa yunubie nɔxunma, a xa fe mu sɔɔnɛyama, kɔnɔ mixi naxan a tima a xa yunubie ra, a gbilen e fɔxɔ ra, Ala kinikinima a ma.

¹⁴Sɛɛwɛ na mixi bɛ naxan gaaxuma Ala ya ra, kɔnɔ bɔɲɛ xɔrɔxɔɛ kanyi luma tɔɔrɛ nan kui.

¹⁵Mixi ɲaaxi naxan ɲama setare yamarima, a luxi nɛ alɔ yɛtɛ magaaxuxi nun wulai sube xaaɲɛ.

¹⁶Mangɛ xaxilitare mixi tɔɔrɔma nɛ, kɔnɔ mangɛ naxan naafuli tinxintare xɔnma, na simaya xɔnkuye sɔtɔma nɛ.

¹⁷Mixi naxan a kolon a bɔɲɛ kui a faxɛ tixi, na luma a gi ra nɛ han aligiyama. Mixi yo naxa na kanyi mali.

¹⁸Mixi naxan ɲɛrɛma tinxinyi ra, na kisima nɛ, kɔnɔ filankafui tan birama nɛ kerenyi ra.

¹⁹Mixi naxan a xa bɔxi rawalima, na baloe sɔtɔma nɛ, kɔnɔ naxan birama fe fufafu fɔxɔ ra, na setareɲa nan sɔtɔma.

²⁰Mixi dugutɛgɛxi barakɛ sɔtɔma nɛ, kɔnɔ naxan gbatama bannaya ra, a ɲaxankatama nɛ.

²¹A mu lan mixi xa mixi rafisa a boore bɛ, kɔnɔ mixi nde fe ɲaaxi rabama taami xuntunyi xa fe ra.

²²Milante gbatama bannaya ra, kɔnɔ a mu a kolon a tɔɔrɛ nan tun sɔtɔma.