Taalie 27:12-27

¹²Xaxilima a yɛtɛ ratangama fe xɔrɔxɔɛ ma, kɔnɔ xaxilitare tan soma nɛ na kui, a fa ɲaxankatɛ sɔtɔ.

¹³Mixi xa sɛɛkɛ se rasuxu a naxan taani xɔɲɛ bɛ, xa na mu a ra a naxan taani langoe bɛ.

¹⁴I na i dɔxɔboore xɛɛbu i xui itexi ra gɛɛsɛgɛ gbe ra, i bara a bɔɲɛ raɲaaxu a ma i tan mabiri.

¹⁵Ginɛ fitinɛtɔɛ luxi nɛ alɔ tunɛ di naxan fɛɛɲɛnma fa ra.

¹⁶Na ginɛ mɔɔli raxanfe, na maniyama foye raxanfe ra, a suxufe xɔrɔxɔ alɔ ture suxufe i bɛlɛxɛ ra.

¹⁷Wure nan wure raluganma. Mixi a boore rakamalima nɛ.

¹⁸Mixi naxan mɛɛnima xɔrɛ bili ma, a a bogi donma nɛ. Mixi naxan mɛɛnima a karamɔxɔ ma, a binyɛ sɔtɔma nɛ.

¹⁹Adama yatagi na ki naxɛ, na nan minima ye xɔɔra. Adama yati na ki naxɛ, na toma nɛ a bɔɲɛ kui.

²⁰Aligiyama mu wasama mixi faxaxie ra, adama fan mu wasama a waxɔnse ra.

²¹Xɛɛma nun gbeti matoma tɛ ra, kɔnɔ mixi makiitima a xili nan ma.

²²I na maale din, a lagi bama nɛ a ma, kɔnɔ xaxilitareɲa mu bama xaxilitare bɔɲɛ kui.

²³I xa i xa xuruse birin kolon a fanyi ra, i xa mɛɛni e ma,

²⁴barima bannaya mu buma tɛmui birin, xunnakeli fan mu buma abadan.

²⁵Xurusee na gɛ e balode ɲooge ra naxan toma fiili ma nun geya fari,

²⁶yɛxɛɛe xabe yailan dugi ra i bɛ, si kontonyi findi kɔbiri ra i xɛ sarama naxan na,

²⁷si xiɲɛ findi i xa denbaya nun i xa konyie balo se ra.