Taalie 26:1-14

¹Kuye mu xinbelima sogofure ra, tunɛ mu fama maale xaba tɛmui, na ki a mu lan lɔnnitare xa binyɛ sɔtɔ.

²Dankɛ mu mixi fanyi suxuma. Na fe luma nɛ alɔ xɔni naxan mu dɔxɔma, koyinma xa a gɔnɔ.

³Soe bɔnbɔma nɛ alako a xa a gi, karafoe rasoma nɛ sofale dɛ i alako mixi xa a raɲɛrɛ, xaxilitare fan xuruma nɛ wuri ra alako a xa matinxin.

⁴I naxa xaxilitare yaabi a maɲɔxun ki ra, xa na mu a ra wo birin lan.

⁵I xa xaxilitare yaabi a maɲɔxun ki ma, xa na mu a ra a a yɛtɛ findima xaxilima nan na.

⁶Mixi naxan xaxilitare xɛɛma masenyi nde tide, na bara a yɛtɛ tɔɔrɔ.

⁷Taali wɔyɛnyi naxan minima xaxilitare dɛ i, na luxi nɛ alɔ mabɛnyi sanyi naxan sɛnbɛ mu na.

⁸Xaxilitare binyafe luxi nɛ alɔ gɛmɛ safe laati kui.

⁹Taali wɔyɛnyi naxan minima xaxilitare dɛ i, na luxi nɛ alɔ luxusinyi naxan na siisila bɛlɛxɛ i.

¹⁰Mixi naxan wali soma xaxilitare yi ra, xa na mu a ra mixi yi ra a mu naxan kolon, na luxi nɛ alɔ sɔɔri naxan tanbɛ wolima ɲama mabiri.

¹¹Xaxilitare naxan gbilenma a xa daxuɲa ma, na luxi nɛ alɔ bare naxan gbilenma a xa bɔxunyi don na.

¹²Xaxilitare fan fisa mixi bɛ naxan a yɛtɛ findixi lɔnnila ra. Fe sɔɔnɛyama nɛ na xaxilitare bɛ dangife na yɛtɛ igboe ra.

¹³Mixi tunnaxɔnɔxi nan a falama, «Yɛtɛ na kira ra, yɛtɛ na taa kui.»

¹⁴Naadɛ rabima, a man nagalima, alɔ tunnaxɔnɛ naxan a ya rabima a xa sade ma, a man xi.