Taalie 22:16-21

¹⁶Mixi naxan setare tɔɔrɔma geeni nde xa fe ra, nun mixi naxan banna kima, na firinyi findima fuxarila nan na.

¹⁷I i tuli mati lɔnnilae xa marasi ra, i bɔɲɛ rabi n ma masenyie bɛ.

¹⁸A lan i xa e ragata i sondonyi kui, e naxa makuya i dɛ ra.

¹⁹N wama i rasife nɛ to lɔxɔɛ, alako i xa i yɛtɛ taxu Alatala ra.

²⁰N bara taali tongo saxan sɛbɛ i ma, naxee findixi marasi nun lɔnni ra i bɛ,

²¹alako i xa nɔndi xɔri yati kolon, i fan xa sa na iba i xɛɛma bɛ.