Taalie 15:9-30

⁹Alatala mixi ɲaaxi xa kira xɔnma, kɔnɔ mixi naxan birama tinxinyi fɔxɔ ra a rafan a ma.

¹⁰Kira fanyi bɛɲinfe findima ɲaxankatɛ nan na. Xurutareɲa mixi xun tima faxɛ kira nan ma.

¹¹Alatala to fe birin kolon, hali naxan nabama aligiyama nun yahannama, a ibunadama bɔɲɛ fan kolon.

¹²Yɛtɛ igboe mu wama marasi xɔn ma, a mu sigama lɔnnila yire.

¹³Bɔɲɛ sɛɛwaxi mixi lahalɛ fanma, kɔnɔ bɔɲɛ tɔɔrɔxi mixi lahalɛ kanama nɛ.

¹⁴Xaxilima lɔnni nan fenma, kɔnɔ xaxilitare daxu wɔyɛnyi nan tun falama.

¹⁵Hali misikiinɛ tɔɔrɔ a xa simaya kui, xa a bɔɲɛ sɛɛwaxi, na findima nɛ baloe ra a bɛ.

¹⁶Setare Ala yaragaaxui, fan banna xaxili ifuxi bɛ.

¹⁷Bande ɲiɲɛ donfe xanunteya kui, na fan sube donfe bɛ gbɛsɛnxɔnnɛya kui.

¹⁸Bɔɲɛ rate gere xɔrɛ isɔxɔma nɛ, bɔɲɛ ragore sɔnxɔɛ raxinbelima nɛ.

¹⁹Tunnaxɔnɛ xa kira mabalanxi tunbee nan na, kɔnɔ tinxintɔɛ xa kira ɲɛrɛ ɲɔxun.

²⁰Di lɔnnixi findima sɛɛwɛ nan na a baba bɛ, kɔnɔ di lɔnnitare yoma nɛ a nga ma.

²¹Xaxilitareɲa rafan lɔnnitare ma, kɔnɔ xaxilima xa kira tinxin.

²²Marasitareɲa wali kanama nɛ, kɔnɔ marasi gbegbe wali nan sɔɔnɛyama.

²³Sɛɛwɛ na mixi bɛ naxan fata a boore yaabide. Wɔyɛnyi tide gbo naxan falaxi a fala ki ma nun a fala tɛmui ma.

²⁴Xaxilima xa kira a ratema nɛ koore ma, a a mali a xa aligiyama kira matanga.

²⁵Alatala yɛtɛ igboe xa banxi rabirama nɛ, kɔnɔ a kaaɲɛ ginɛ xa bɔxi makantama nɛ.

²⁶Maɲɔxun kobi raɲaaxu Alatala ma, kɔnɔ wɔyɛn fanyi tan sɛniyɛn.

²⁷Milante findima nɛ tɔɔrɛ ra a xa denbaya bɛ, kɔnɔ naxan mu wama geeni tinxintare xɔn, na kanyi kisi nan sɔtɔma.

²⁸Tinxintɔɛ fe matoma nɛ a fanyi ra beenu a xa yaabi nde fi, kɔnɔ fe ɲaaxi mafura minide mixi ɲaaxi dɛ i.

²⁹Alatala makuya mixi ɲaaxie ra, kɔnɔ a a tuli matima tinxintɔɛe xa maxandi ra.

³⁰Xɛɛra ya iyalanxi mixi bɔɲɛ rasɛɛwama nɛ, xɛɛraya fanyi sɛnbɛ nan fima mixi ma.