1Oo Yelusalem wala mote niga mainana, bi niganana lavam i wai geḡa! Wala ba dobu matabudi a sanasanadadem, bi niganana kitam maibena iwape. Tam wala kitam maibena ḡalibona mwanena bi niganana kitam maibena taupaulayababa.
2Tana dudubala onena ya ḡabaḡaba bi matana sa uwauwa. Bi ena ewali kauwa mote bamo aiyai te te yai nuwauba. Niganana ena lava ḡesaudi a nuwavitala te kana ḡaviya bi kana pota a yesi.
3Ḡaviya a tapipila te Diuda lavedi a sulagudegudedi bi ai doli nawedi. Tedi a panidi bi lisidimo a miyana maibena tautavatava. Bi edi dobumo a voiyedi te ai taupaulayababa, mote bamo edi ani miya kauwa. Mote luvana sima naila sima nawa.
4Soi laḡandimo mote aiyai bamo ima nawanawa, Maimaituwa ena vanuwemo ima laulaudune. Ḡome guguini salesaledi niganana ai nuwaboya bi pilipilisi a kaiḡabala. Taun gananakukuna mataetidi mwakomwakoko a kasidi, bi Saiyon ena yavi i didiga gulata.
5Ena gebogebo dabanemo Bada i voiye te i wainuwatoi. Ena ḡaviya niganana ai badaye bi a ka kavakava. Tana a giu waigusugusu, bi natunatuna ai doli nawedi walidobuḡa.
6Yelusalem, wala ba kitana i visuvisuna bi mulemulelena bi niganana mba visuna bi mulelena i kovi. Ena waibabada ba maibena ḡamoḡamo diya, kanikani pekidi bi kani sa tavutavu. Tunidi a laugaligali te mote ḡemoḡemotina kediḡaviya sima naile kamaḡedi.
7Yelusalem lavedi sa nawanawa yabayababa bi sa wainuwatoi. Niganana edi noḡota i munaḡa te wala edi visuvisu a noḡotidi. Sauginemo edi ḡaviya a legauvaidi ba ḡome mote aiyai te maso i saguvaidi. Edi ḡaviya Yelusalem taunina ai kalaḡosa bi ai gwaigwaiyedi.
