Saylar 26:1-19

¹Vəbadan sonra Rəbb Musaya və kahin Harun oğlu Eleazara dedi:

²«Bütün İsrail övladlarının icmasını, ailələrinə görə iyirmi və ondan yuxarı yaşda döyüşə qabil olan İsrail övladlarını sayın».

³Musa ilə kahin Eleazar İordan çayı yanında, Yerixo qarşısında Moav düzənliyində onlarla danışıb dedi:

⁴«Rəbbin Musaya əmr etdiyi kimi iyirmi və ondan yuxarı yaşda olanları siyahıya alın!» Misir torpağından çıxan İsrail övladları bunlardır:

⁵İsrailin ilk oğlu Ruven, Ruvenlilər bunlardır: Xanok soyundan Xanok nəsli; Pallu soyundan Pallu nəsli;

⁶Xesron soyundan Xesron nəsli; Karmi soyundan Karmi nəsli.

⁷Ruvenlilərin nəsilləri bunlardır, sayları 43 730 nəfər idi.

⁸Palunun oğlu Eliav,

⁹Eliavın oğulları Nemuel, Datan və Aviram idi. Bunlar o Datanla Aviramdır ki, icma tərəfindən seçildi və Rəbbə üsyan edən Qorahın tərəfdarlarına qoşulub Musa ilə Haruna zidd getdilər.

¹⁰Qorahla 250 yoldaşını od yandırıb yox edəndə yer yarıqları onları uddu. Qorahla birlikdə ölənlər başqalarına da bir ibrət oldu.

¹¹Qorahın nəsli isə ölmədi.

¹²Nəsillərinə görə Şimeonlular bunlardır: Nemuel soyundan Nemuel nəsli; Yamin soyundan Yamin nəsli; Yakin soyundan Yakin nəsli;

¹³Zerah soyundan Zerah nəsli; Şaul soyundan Şaul nəsli;

¹⁴Şimeon nəsilləri bunlardır, sayları 22 200 nəfərdir.

¹⁵Nəsillərinə görə Qadlılar bunlardır: Sefon soyundan Sefon nəsli; Haqqi soyundan Haqqi nəsli; Şuni soyundan Şuni nəsli;

¹⁶Ozni soyundan Ozni nəsli; Eri soyundan Eri nəsli:

¹⁷Arod soyundan Arod nəsli; Areli soyundan Areli nəsli.

¹⁸Qad nəsilləri bunlardır, sayları 40 500 nəfərdir.

¹⁹Yəhudanın iki oğlu var idi: Er və Onan. Onlar Kənan torpağında öldülər.