SAN LUCAS 1:8-42

⁸A̱ma yune ne, quenda̱h yahn chidocuya̱n che combiero yahn Zacarías che cova̱h ye na̱n Dendiohs.

⁹Chidocuya̱n chahn ne, ro ro redin ye sortear deh ntiyon din queri a̱ma ye, ne ro min ne, quenda̱h yahn Zacarías che conda̱ ye chete ya̱co chahte yahn Dihvo vo, ca̱hcoya̱hn ye cuhn.

¹⁰Ura che riche cuhn me ne, reva̱h nducoya̱ca ihyan ya̱n, chenun ye cua̱hn chevah.

¹¹Tuhme chihndero a̱ma ángel che dechuh Dendiohs, chandi ye na̱n Zacarías la̱do ta̱h cua̱co yahn na̱n ta.

¹²Cuahn che ndihchero Zacarías ángel me ne, a̱ma dihya ye chi.

¹³Ate ra̱hn ángel me ri ye ihyan: ―Zacarías, hua dihye co, te a chihnevan Dendiohs che chique. Ma̱n ne, nda̱hta yehn Elisabet ne, nda̱ca a̱ma sa̱hn da̱ya te, ne conehn che duche se, Jua̱n.

¹⁴A̱ma co yene, ne namin co yeno a̱ma ya̱hn ihyan che cuhndeya̱n se,

¹⁵te daye ne, chahte vederihquentiyon ca̱h Dendiohs, conan cuma se. Hua cuh se vino, nde hua cuh se nde a̱ma na̱n nune che din che cocoh se. Conun Vaco Ndah yahn Dendiohs sa̱hn nde ro che ametah cuhndeya̱n se.

¹⁶A̱ma ya̱hn ihyan nación yahn Israel, din se che ndaconan cotahno ye Dihve ye Dendiohs.

¹⁷Nda̱ se tahque mena̱n ca che co Dihvo vo, conan cuma se vederihquentiyon nduhca̱ che quenan cuma Elías, ca̱va che ndoya̱n ihyan nduco indihte yahn ye ma̱n, ca̱va che cotahno ihyan Ndudo yahn Dendiohs nduhca̱ che ritahno ihyan che ndah ihyan ye na̱n Dendiohs ma̱n. Tihca̱ ca̱hcoya̱n se chedave yahn a̱ma ya̱hn ihyan, ca̱va che nevahnecun ye Dihvo vo.

¹⁸Chiquerune Zacarías ángel me: ―¿Ta̱ca̱ cotahnó che ra̱hn ne ne?, te u ne, a indihte u. Namin ihyan nda̱hta yáhn, a indihte ye.

¹⁹Ndahconan ángel me yahn ye: ―U ne, Gabriel che redináhn che rihquentiyon Dendiohs. Ma̱n ye tahve ye u, ca̱va che ca̱hmá ndoque ndudo ndah cuh.

²⁰Ndudo che a rá̱hn ndoque ne, va che conahn, ate nducote hua chitehne ne, co lihme di, ne hua co nte nde nda̱ ro che cuhndeya̱n daye.

²¹Numanahn min ne, ihyan ya̱n chahn ne, chenan rino ye, ne rahn ino ye che a̱ma rendah Zacarías chete ya̱co.

²²Cuahn che ndiquenda̱h ye ne, redin ta̱h redin na̱n ye, te chi lihme ye. Tuhme chenahn ihyan chahn che ndihchero ye a̱ma vederihno chete ya̱co.

²³Cuahn che chihno ndate che quenan Zacarías ntiyon min ne, cona̱hn ye ndeva̱co ye.

²⁴Chuh neve ro min ne, a quenun da̱ya ihyan nda̱hta yahn ye Elisabet. Ihyan min ne, quenun ye vah; hua chahn ye nde a̱ma cua̱n chete che uhn iyo, ne ndedecadino ye:

²⁵“Dihvé Dendiohs din ye vederihno cuh nducó. Ma̱n ne, ametah co cuihná̱n na̱n ihyan.”

²⁶Chihno te a̱n iyo ne, tahve tun Dendiohs ángel Gabriel, cuahn ye a̱ma ya̱n lihn che duche Nazaret, esta̱do yahn Galilea.

²⁷Nda ye ndudo che dechuh Dendiohs yahn a̱ma nda̱hta ntuco che duche ye María. Nda̱hta me ne, a va ndudo yahn ye che cahneva̱co ye nduco José, a̱ma ihyan che nda̱ta yahn David.

²⁸Cuahn che nda̱ ángel me na̱n che quenun nda̱hta me ne, ra̱hn ye ri ye ihyan: ―Necuma di. Dendiohs ne, yahino ye di, ne nduco ye di. A tenda̱hnun ye di va̱n nducoya̱ca nda̱hta.

²⁹Cuahn che chihnevan ye che ra̱hn ángel me ne, cuahn ino ye, ne ndedecadino ye: “¿Dehra cuande che tihca̱ ra̱hn ye nducó?”

³⁰Tuhme ra̱hn ángel me ri ye ihyan: ―María, dehve rahque, te Dendiohs ne, yahino ye di.

³¹Ma̱n ne, nda̱ca a̱ma daye, ne conehn che duche ye, JESUS.

³²Ihyan min ne, a̱ma chahte vederihquentiyon conan cuma ye, te Da̱ya Dendiohs che a̱ma yudo ye ihyan. Dihvo vo Dendiohs ne, nda̱hco ye vederihquentiyon che quenan cuma David ta̱h ye.

³³Ca̱hcantiyon ye ihyan nación yahn Israel, ne hua cuihno vederihquentiyon yahn ye.

³⁴Tuhme chiquerune María ángel me: ―¿Ta̱ca̱ co conahn che ra̱hn ne ne?, te u ne, ametah cahneva̱có.

³⁵Ndahconan ángel me yahn ye: ―Co Vaco Ndah yahn Dendiohs, conun di, ne nduco vederihquentiyon yahn Dendiohs conahn. Chemin che daye che cuhndeya̱n ne, Da̱ya Ndah yahn Dendiohs.

³⁶A ndihche che din Dendiohs nduco ta̱hn vih Elisabet. Andahre a ndico te, ne hua renda̱ca da̱ya te, ate ma̱n ne, quenun da̱ya te a chi a̱n iyo,

³⁷te Dendiohs ne, nducuahn che nahn ye ne, rinahn.

³⁸Tuhme ra̱hn María: ―Conahn nduhca̱ che ra̱hn ne, te u ne, renevahnecún che rihquentiyon Dihvé Dendiohs. Chihno min ne, cona̱hn ángel me.

³⁹A̱ma o ro min ne, cuahn María a̱ma ya̱n che va cua̱hn icoya̱hn, esta̱do yahn Judea.

⁴⁰Nda̱ ye min ne, min chenda̱ ye chete va̱co Zacarías, ne neca̱h ye Dendiohs Elisabet.

⁴¹Ndeta̱hn chihnevan Elisabet che neca̱h María Dendiohs ihyan ne, nuhn decua̱h yahn ye che quenun chete ye, ne chiya Vaco Ndah yahn Dendiohs, quenun ihyan.

⁴²Ra̱hn ye: ―Va̱n nducoya̱ca nda̱hta ne, a tenda̱hnun Dendiohs di. Namin a tenda̱hnun ye daye.