Lukas 1:8-42

⁸A kadekadeo ni a kapwaiada a dodok en samero mon Kot ni ansau o, me a pwin pwaisaneki,

⁹Duen a kin wiaui ren samero kan, o ansau en isik mairong lao leler, a kotilong ong nan im en kaudok en Kaun o.

¹⁰A pokon kalaimun mi liki, wiawia kapakap ni klok en isis.

¹¹A tounlang en Kaun amen pwara dong i, kotikot ni pali maun en pei saraui en potik.

¹²Sakarias lao masani, ap lusikida o masapwekada.

¹³A tounlang o masani ong i: Sakarias, der masak, pwe om kapakap pwaidar, om paud Elisapet pan naitikeda seri ol amen, a koe pan ki ong mar a Ioanes.

¹⁴O a pan kare ong uk peren o popol, o me toto pan perenki a ipwidi.

¹⁵Pwe a pan lapalap ren Kaun o, a sota pan nim wain, pil so eu song en soko; a pan dir en Ngen saraui nan kupur en in a.

¹⁶A me toto ren nain Israel akan, me a pan kawuki ong Kaun ar Kot.

¹⁷A pan tiong mo a ni ngen o roson en Elias, pwen kawuki ong seri kan mongiong en sam arail akan o me sopeik kan ong lamalam en me pung kan, pwen kaonopadang Kaun o pwin aramas lelapok eu.

¹⁸A Sakarias masani ong tounlang o: Da me i en asaki me wet? Pwe i ol laudalar amen, o ai paud pil likailapalar.

¹⁹A tounlang sapeng masani ong i: Ngai Kapriel, me kin ariri Kot, o me pakadarado, en lokaia ong uk, o wa dong uk rongamau pukat.

²⁰Kilang, koe pan lotong la, o sasa lokaia lao lel ran o, me mepukat pan pwaida, pweki om sota kamelele ai kasoi, me pan pwaida ni a ansau.

²¹A pokon o auiaui Sakarias, puriamuiki a pwapwand nan im en kaudok.

²²A lao pedoi sang, a solar kak masan ong irail. Irail ap dedeki, me a udial manaman eu nan im en kaudok o. A olol ong irail o lotonglar.

²³Kadekadeo ran akan en a dodok lao nikier, a kotin purelang sap we koieilang im a.

²⁴Murin ran pukat a paud Elisapet liseanda o mimieta nan deu a saunipong limau indada:

²⁵Iduen Kaun o kotin wiai ong ia ni ran oko, ni a kotin masan dong ia, pwen kotiki sang ia kanamenok pai ren aramas.

²⁶Ni kawonu en saunipong tounlang Kapriel pakadarala sang ren Kot ong nan kanim en Kaliläa eu, me ad a Nasaret,

²⁷Ren seripein makelekel amen, me kisin nin ong ol amen, me mar a Iosep, kisan kadaudok en Dawid; seripein makelekel o adaneki Maria.

²⁸Tounlang o kotilong ong nan deu a masani ong i: Kaselelia Maing, kom meid pai, Kaun o kotikot re omui! Kom meid pai nan pung en li akan!

²⁹A lao kilanger i, o rongadar a masan, ap masapwekadar madamadaua: Duen song en ranamau o.

³⁰A tounlang masani ong i: Maria, ender masak, pwe komui me konekonelar ren Kot.

³¹A kilang, komui pan liseanda o naitikeda seri ol amen, a komui pan ki ong mar a Iesus.

³²Nan i me pan lapalap, o a pan maraneki Sapwilim en Kaun lapalap, o Kaun Kot pan kotiki ong i mol en sam a Dawid.

³³O a pan kakaunda kadaudok en Iakop kokolata, o sapwilim a wei sota pan imwila.

³⁴Maria ap masani ong tounlang o: Daduen mepukat pan kak wiaui, aki i sasa ol amen?

³⁵Tounlang o kotin sapeng masani ong i: Ngen saraui pan kotin ti po omui o roson en Kaun lapalap pan kipa komui di, i me saraui o, me pan ipwi sang komui, pan maraneki: Sapwilim en Kot.

³⁶O masani, ri om Elisapet pil liseandar ni a likailapala, a pan naitikeda seri ol amen, a kawonu en saunipong ansau wet; iei i me dapwan,

³⁷Pwe sota meakot, me Kot sota kak ong.

³⁸A Maria potoan ong: Masani, ngai lidu en Kaun o; en wiaui ong ia duen omui masan. Tounlang o ap kotila sang re a.

³⁹I ran oko Maria madang kotila pon nana o nan kanim en Iuda eu,

⁴⁰Ap pedelong ong nan im en Sakarias o ranamau ong Elisapet.

⁴¹Kadekadeo Elisapet lao ronger en Maria a ranamau ong i, seri o ap mokideda nan kaped a; a Elisapet ap direkila Ngen saraui,

⁴²O ngil laudeda masani: Komui meid pai ren li akan, o meid iasanai ipwin kupur omui!