San Lucas 1:8-42

⁸Bdxin dza gul‑laꞌ uláz qui cöꞌ naꞌ nabáblenëꞌ Zacarías lunëꞌ dxin lahuëꞌ Dios, lu yöl‑laꞌ bxuz quequëꞌ.

⁹Ca nalëbcnëꞌ tunëꞌ bxuz, gul‑laꞌ uláz queëꞌ Zacarías gyaziëꞌ lu latj laꞌy qui gdauꞌ quië uzéguiꞌë yal lahuëꞌ Xanruꞌ Dios.

¹⁰Tsal niꞌ ruzéguiꞌë yal Zacarías naꞌ, gulacuáꞌ niꞌl yúguꞌtë bunách, tuꞌlídz Dios.

¹¹Laꞌ naꞌz buluíꞌ lahuëꞌ gbaz laꞌy queëꞌ Xanruꞌ ga zoëꞌ Zacarías naꞌ, zuinëꞌ tslaꞌa yubél bcugu laꞌy ga naꞌ regui yal.

¹²Catiꞌ bléꞌinëꞌ gbaz laꞌy naꞌ Zacarías, gröꞌë baguíꞌi len gudxi bdzöbnëꞌ.

¹³Niꞌr gudxëꞌ lëꞌ gbaz laꞌy naꞌ, gnëꞌ: ―Zacarías, cutu gádxinuꞌ, le chbyönnëꞌ Dios le rnabuꞌ lahuëꞌ, atiꞌ uzoanu‑biꞌ tubiꞌ biꞌi bö́nniꞌdauꞌ Elisabet, ngul quiuꞌ, atiꞌ guꞌu labiꞌ Juan.

¹⁴Gataꞌ quiuꞌ le uziꞌu xbey len udzijnuꞌ, atiꞌ zian nup ludziji ládxiꞌgac le guljbiꞌ biꞌidauꞌ naꞌ,

¹⁵le gáctscabiꞌ zxön lahuëꞌ Dios. Cutu guiꞌjbiꞌ xisi uva len clëg tu le rsudxi bunách, atiꞌ gdu sóalenëꞌ‑biꞌ Dios Böꞌ Laꞌy catiꞌ su lau ziꞌa galjbiꞌ.

¹⁶Gunëꞌ Juan ni ga luhuöác queëꞌ Xanruꞌ zian bunách Israel.

¹⁷Nörëꞌ Lëꞌ ca Xanruꞌ, atiꞌ laꞌcuaꞌlen lëꞌ Böꞌ naꞌ len yöl‑laꞌ huac naꞌ gulacuaꞌlen Elías, bönniꞌ bëꞌë didzaꞌ uláz queëꞌ Dios. Cni gunëꞌ quië unëꞌ tuz nup nacgac xuz len zxiꞌnquëꞌ, len uzéjniꞌnëꞌ nup taꞌdáꞌbagaꞌ quië lacquëꞌ tsahuiꞌ, len ucözëꞌ bunách lacquëꞌ sinaꞌ laꞌzíꞌ lu naꞌquëꞌ Xanruꞌ.

¹⁸Gnabnëꞌ gbaz laꞌy naꞌ Zacarías, rnëꞌ: ―¿Bizxa gac bëꞌ quië gnözdaꞌ lac lë ni? Chnagulaꞌ nedaꞌ len chnagulnu caꞌ ngul quiaꞌ.

¹⁹Bubiꞌë didzaꞌ gbaz laꞌy naꞌ, rnëꞌ: ―Nedaꞌ leaꞌ Gabriel. Runaꞌ dxin lahuëꞌ Dios. Lëczëꞌ bsölëꞌë nedaꞌ güíꞌlenaꞌ liꞌ didzaꞌ, len quíxjöiꞌdaꞌ liꞌ didzaꞌ dxiꞌa ni.

²⁰Naꞌa, le cutu gyéjlëꞌu xtidzaꞌa, gcödzuꞌ len cutur gac gneuꞌ catiꞌ gacr lë ni. Yúguꞌtë lë ni udxín catiꞌ gdxin dza qui.

²¹Tsal niꞌ tac lë ni, nacuáꞌ niꞌl bunách, taꞌbözëꞌ Zacarías, atiꞌ tuꞌbannëꞌ le rdzeynëꞌ xtsey ga naꞌ zoëꞌ lu latj laꞌy.

²²Catiꞌ burujëꞌ Zacarías, cutu guc güíꞌlenëꞌ lequëꞌ didzaꞌ, atiꞌ gláquibeꞌinëꞌ bléꞌinëꞌ tu le buluiꞌinëꞌ lëꞌ Dios lu latj laꞌy. Buláꞌ buluiꞌzëꞌ Zacarías, buzéjniꞌnëꞌ lequëꞌ, le curác gnëꞌ.

²³Catiꞌ bzaꞌa yuguꞌ dza naꞌ ral‑laꞌ gunëꞌ dxin lahuëꞌ Dios Zacarías, niꞌr böjëꞌ lidxëꞌ.

²⁴Gdöd yuguꞌ dza naꞌ biaꞌnu‑biꞌ lëꞌnu biꞌidauꞌ Elisabet, ngul queëꞌ Zacarías naꞌ, atiꞌ gdu gayuꞌ beoꞌ bugaꞌnznu yuꞌu. Gzaꞌ ládxiꞌnu,

²⁵rnanu: ―Cni runëꞌ quiaꞌ Xanruꞌ. Ruzáꞌ ladxëꞌë quiaꞌ biꞌidauꞌ, len runëꞌ ga cutur utuiꞌdaꞌ laugac bunách.

²⁶Catiꞌ chguc xop beoꞌ, buluíꞌ lahuëꞌ gbaz laꞌy naꞌ, le bsölëꞌë lëczëꞌ Gabriel Dios, tsijëꞌ Nazaret, tu yödz luyú Galilea.

²⁷Dios bsölëꞌë lëꞌ niꞌ tsajyúëꞌ‑biꞌ tubiꞌ biꞌi ngul raꞌbandauꞌ lëbiꞌ María. Chnazíꞌ lu naꞌbiꞌ María utság náꞌlenbiꞌ‑nëꞌ bönniꞌ lëꞌ José. Naquëꞌ José zxiꞌn xsoëꞌ David, bönniꞌ gna béꞌinëꞌ bunách Israel.

²⁸Catiꞌ gyaziëꞌ Gabriel naꞌ ga zoabiꞌ María, gudxëꞌ‑biꞌ: ―Padiux. Dios ruzáꞌ ladxëꞌë quiuꞌ. Zóalenëꞌ liꞌ Xanruꞌ Dios. Lëczëꞌ benëꞌ ga nacruꞌ liꞌ bicaꞌ ba ca yúguꞌtë ngul.

²⁹Catiꞌ bléꞌibiꞌ gbaz laꞌy naꞌ María, gröꞌbiꞌ baguíꞌi niꞌa qui didzaꞌ naꞌ bëꞌë, len rubani ládxiꞌbiꞌ nacx rna didzaꞌ naꞌ bulidzëꞌ‑biꞌ gbaz laꞌy naꞌ.

³⁰Niꞌr gudxëꞌ‑biꞌ gbaz laꞌy naꞌ, rnëꞌ: ―María, cutu gádxinuꞌ, le chbdél‑liꞌnuꞌ le ruzáꞌ ladxëꞌë quiuꞌ Dios.

³¹Naꞌa, tsuꞌubiꞌ lëꞌu tubiꞌ biꞌidauꞌ, atiꞌ uzúꞌ‑biꞌ tubiꞌ biꞌi bö́nniꞌdauꞌ, atiꞌ guꞌu labiꞌ Jesús.

³²Jesús ni gáctërëꞌ blau, len siꞌ Lëꞌ Zxiꞌnëꞌ Dios, Nu nactër blau. Xanruꞌ Dios gunëꞌ ga gna bëꞌë ca naꞌ gna bëꞌë David, xuz gul gdöd queëꞌ.

³³Jesús naꞌ gna béꞌitecznëꞌ bunách Israel, atiꞌ le gna bëꞌë Lëꞌ gatga udx qui.

³⁴Niꞌr gnábibiꞌ gbaz laꞌy naꞌ María, rnabiꞌ: ―¿Nacxcz gac lë ni, le cutu zóalenaꞌ bönniꞌ?

³⁵Bubiꞌë didzaꞌ gbaz laꞌy naꞌ, rëꞌ‑biꞌ: ―Gdxinëꞌ ga zuꞌ Dios Böꞌ Laꞌy, atiꞌ soalen liꞌ yöl‑laꞌ huac queëꞌ Dios, Nu nactër blau, le gac ga zuꞌ ca tu zxul rguꞌu böaj. Qui lë ni naꞌ biꞌi bö́nniꞌdauꞌ naꞌ ral‑laꞌ galjbiꞌ, tsuꞌubiꞌ lu nëꞌë Dios, atiꞌ siꞌ labiꞌ Zxiꞌnëꞌ Dios.

³⁶Yetú caꞌ, Elisabet, ngul diꞌa dza quiuꞌ, chnuaꞌnu‑biꞌ caꞌ lëꞌnu tubiꞌ biꞌi bö́nniꞌdauꞌ zal‑laꞌ chnagulnu. Gulanë́ꞌ queënu: “Nacnu ngul huödx”, san chzeaj xop beoꞌ nuaꞌnu‑biꞌ lëꞌnu biꞌidauꞌ naꞌ.

³⁷Cutu bi zoa le cusáquiꞌnëꞌ Dios.

³⁸Niꞌr María gnabiꞌ: ―Ni zoaꞌ. Tsaz nacaꞌ huen dxin queëꞌ Xanruꞌ. Gac quiaꞌ ca naꞌ chgnauꞌ. Niꞌr laꞌ buzaꞌtëꞌ gbaz laꞌy naꞌ ga zoabiꞌ María.

³⁹Laꞌ dza niꞌz gyuꞌubiꞌ nöz María, atiꞌ jaréluꞌbiꞌ gyeajbiꞌ ga nac guíꞌadauꞌ, bdxinbiꞌ tu yödz luyú Judea.

⁴⁰Niꞌ gyazbiꞌ lidxëꞌ Zacarías len gudxbiꞌ‑nu Elisabet: ―Padiux.

⁴¹Catiꞌ byö́ninu Elisabet didzaꞌ naꞌ bëꞌbiꞌ María, laꞌ butatë cuinbiꞌ biꞌi huëꞌndauꞌ naꞌ yuꞌubiꞌ lëꞌnu, atiꞌ dusóalenëꞌ‑nu Dios Böꞌ Laꞌy.

⁴²Niꞌr bëꞌnu zidzj didzaꞌ Elizabet, rnanu: ―Chnunëꞌ Dios ga nacruꞌ liꞌ bicaꞌ ba ca yúguꞌtë ngul len chnunëꞌ caꞌ ga nacbiꞌ bicaꞌ ba biꞌidauꞌ naꞌ yuꞌubiꞌ lëꞌu.