Luka 1:8-42

⁸Ena huia kohena eai wa Eaubada matana eai i paisoaei.

⁹Kohena edi laulau doha meta, isi se lau Guiau ena dubu tabuna alona eai muramura panepane se gabu.

¹⁰Huia wa muramura panepanena se gabu tatao moutuadi lailai murimuri eai se laulau‐uura.

¹¹Ia arinai Guiau ena aneru esau i taumasaraha muramura panepanena wa hatahatana teha tutuna eai i totoro.

¹²Sakaria ia ie ita nuana i ponopono, aruana ie loi.

¹³Aneru abo i ribalau ia arinai i ene, “Sakaria e, tabu u matausi: em uura se ataieyao; monem Elisabeta abo i haisu natum tau abo i leawa, ia esana abo u tore Ioane.

¹⁴Abo u nuawoiwoina eo u kode: ia abo se labasi wa debana eai tatao gamagaridi hinage abo se kode.

¹⁵Paana Guiau matana eai ia abo i sae, waina eo nomnom gigigigiboridi taba nige i nomdi; na Earua Tabuna arinai abo se hemonau sinana bogana eai i laoma e.

¹⁶Isaraela nanatunayao moutuadi abo i hesinibuidi Guiau edi Eaubada arinai.

¹⁷Ia Guiau matana eai abo i edabaguna Elia ena laulau eo ena gigibori eai, tamadiyao nuadi bena i heasibuidi nanatudiyao aridi eai: eo tauawaawayagara hinage nuadi bena i heasibuidi taulaulaududurai edi sonoga dobiladi eai: tatao bena i henonohaidi Guiau enana.”

¹⁸Sakaria i ribalau aneru arinai, i ene, “Wau wa ginauri edohana abo ea nuanuatui? Ea tautaubadao, eo monegu hinage ena borimai se gamagari.”

¹⁹Aneru arinana i heuio i ene, “Eau Gaberiela ina, Eaubada matana eai ea totoro; na se hetamariguma bena enam ea riba, bena teina wasa lolona ta ea heribam.

²⁰E oa abo u unauna, taba nige abina u ata riba esau u ribaei i lau e asubenana eai ginauri ta abo se tubu, paana egu riba nige u awamamohoiedi, ia ede abo se tubu edi huia eai.”

²¹Tatao wa Sakaria se bagiwatai, se noo paana huia lohaloha dubu tabuna alona eai ie bawa.

²²I taulagema murimuri eai, bena i riba to nige arinana: se nuatuiyao numa tabuna alona eai ia ginauri esana ie ita: paana i nimaoidi, eo nige arinana hinage.

²³Ana paisoa asubenadi se ohi, ie lau ena numa eai.

²⁴Nei asubenadi muridi eai ia monena Elisabeta ie boga, nawalai haligigi i miayamui, i ene,

²⁵“Nuana Guiau ena abiabigu doha ede teina, agu iwala tatao matadi eai abo i abihai.”

²⁶Nawalai hehaligigi‐esegana eai aneru Gaberiela wa se hetamariama, Eaubada arinai i laoma Galilaia eanua esau eai, esana Nasareta.

²⁷Hasara nuanuasupu esau arinai, ia se awaawaduduei tau esau arinai, esana Iosepa, ia Davida bogana; wau hasara nuanuasupuna wa esana ede Maria.

²⁸Aneru wa i laoma ia arinai i ene, “Eauedo, oa se hedebasaem, Guiau maem: sisine aridi eai oabom u sae!”

²⁹Hasara wa aneru ie ita ena riba wa nuana i ponoponoei, i heunaboisaha, i ene aitoi sahasaha ina?

³⁰Aneru abo i ribalau ia arinai i ene, “Maria e, tabu u matausi: Eaubada arinai oa se hedebasaem.

³¹Oa abo u boga, natum tau abo u labasi, ia esana abo u tore IESU.

³²Ia abo i sae, ia esana abo se tore Saesaedaoina Natuna: ia tamana Davida ena terona Guiau Eaubada abo i mosei ia arinai.

³³Iakobo boganayao ia abo tanuagadi eai i lau e nige nosina; ena basileia hinage taba nige ena abalautom.”

³⁴Maria abo i ribalau aneru arinai i ene, “Wau wa abo edoha egu abiabina, eau nige monegu?”

³⁵Aneru arinana abo i heuio i ribalau ia arinai i ene, “Earua Tabuna abo i dobima, Saesaedaoina ena gigibori abo i helogulogum: arinai hinage meta ginauri tabuna wa abo u labasi esana abo se ribaei Eaubada Natuna.

³⁶Am bogaoyao‐sinena Elisabeta i sinesinebadao, hinage ie boga abo i haisu tau, ia i agari wa ena nawalai harigigi‐esega se lauo.

³⁷Paana ede Eaubada nige ginauri esau ie deha, abo i ginauri.”

³⁸Maria abo i ene, “Eau ina, Guiau ena heaheari sinena; u ribaei wa besi abo i tubu arigu eai.” Aneru ia abo i laugabaei.

³⁹Nei asubenana ne Maria i torohai, i lau heuheula oea tupidi eai, eanua esau Iudea eai,

⁴⁰i awasae Sakaria ena numa eai Elisabeta i aitoiei.

⁴¹Elisabeta Maria ena lautoi i ataiei, natuna bogana eai i lamposi; Elizabeta Earua Tabuna i monau

⁴²i ribalau arinana lailai i ene, “Sisine aridi eai oabom se hedebasaem, bogam aniona i sae ariri!