Sam 9:3-10

³(Bet) Sipu vura mae si Agoi si govete pule taloa sari na qua kana, meke hoqa mate pa kenumu Goi si arini.

⁴Vilavilasa va toṉoto si Agoi koa rina Mua vinaripitui, meke sipu korapa koa pa Mua habohabotuana Baṉara si ele varipitui toka nau Goi koasa Mua vinizata toṉotona.

⁵(Gimel) Ele norei Goi sari na butubutu huporodi, meke ele va mate pani Goi sari na tie kaleadi. Loke tutidia si koa ninae rane ka rane.

⁶Ele tava mate palae pa tinahuara sari na kana ninae rane. Ele huara pani Goi sari na dia vasivasileana, meke ele ta muliṉae hokara sa binalabaladi rini.

⁷(He) Ba se Zihova si koa Baṉara ninae rane ka rane, ele va turua Sa sa Nana habohabotuana varipituina.

⁸Meke varipitui va toṉoto nia Sa sa kasia popoa. Kaqu vilavilasa va toṉoto si Asa koari doduru tie.

⁹(Vav) E Zihova si na aqoroana tadi doduru pu koa ta ṉoṉovala, meke na bara patu ululuna pa vasileana pa totoso tasuna.

¹⁰Meke sarini pu gilania sa Pozamu si kaqu kalavarae zoṉazoṉa koa Agoi, ura Agoi Zihova si lopu kilui sarini pu hata Igo.