Sam 79:3-13

³Ele va matei rini sari na Mua tie, meke zoloro guana kolo sari na eharadi rini pa korapana sa popoa Zerusalema; meke loke tie si koa hola vasina pude pomunu ni sari na tinidi.

⁴Ele ta evaṉae na vina sisireana si gami koari butubutu huporo, zama ṉoṉovala gami na hegehegere ni gami rini.

⁵Kei Zihova; vea seunae gua si kaqu koa hola sa Mua tinaṉaziri? Kaqu bugoro seunae ni gami Goi guana nika huruṉuna ninae rane?

⁶Mu bugoro ni, Mamu ta ṉaziri ni sari na butubutu huporo pu lopu vahesi Igo, meke sari na butubutu pu lopu varavara na raṉego rini si Goi.

⁷Ura ele va matei rini sari na tutina e Zekopi, meke huaria rini sa popoa pu poni ni Goi.

⁸Mu lopu vata goregore ni koa gami sari na sinea tadi na tiatamamami pukerane. Mu tuturei tataru ni gami; ura ele malohoro si gami pa rinaṉeraṉe.

⁹Kei Tamasa, Mu tokani gami, Mamu harupu gami, Mu va sare gami, Mamu taleosoni gami, pude boka tava lavata si Goi koari na tinoni.

¹⁰Na vegua ke zama sari na butubutu tie huporo, “Avei tu sa Mua Tamasa,” gua. Mani ta dogoro koa gami pa matamami sa vina kilasadi rina butubutu huporo pu va matedi sari na Mua nabulu.

¹¹Mani ta avoso koa Goi sa sinilava tadi na Mua tie pu ta pusidi pa vinaripera, Pa Mua ṉiniraṉira nomana si Mu vata rupahi saripu ta pitu pude tava mate.

¹²Kei Baṉara, Mu hobe la nia padana zuapa totoso koari na butubutu huporo sa ṉinovaṉovala gua sapu tavete atu nia rini koa Goi.

¹³Meke gami na Mua tinoni, gami na Mua rovana sipi, si kaqu zama leana atu koa Goi, meke lopu kaqu hite makudo vahesi igo ninae rane ka rane.