Mbouŋ to Yes Israela 79:3-13

³Koiamai tirab tamtoghon tiei katindi, ve siŋ todi ireer inimale ya irau Yerusalem lolo. Ve tiei eta ineep pa itavia di maau.

⁴Tovenen ndug ndug to tineep tigharau ghei ne, tighita ghei, ve tighamgham ŋalalaŋ payei. Yes tiŋiŋiŋ payei, ve tiveleg ghei kat.

⁵O Yoova, pale ŋeez o lolom imuul inim payei? Pale uriuriu ghei, ve mbalmbali tiom ighanghan ghei inimale yab irau sawa isob? Pale mbalmbali tiom izaza tiei tovene itaghoni taghoni gha ila?

⁶Ughur mbalmbali tiom iza to ndug ndug to tiwatag ghom maau, ve tiyamaan katini. Ughur atia iŋarua yes to tisuŋsuŋ payom maau ne, ghoro poia.

⁷Pasa, yei to Yakop papaghu toni, tirab ghei nisob. Ve tiwaghamun taan tonene, le ndug tiei ŋginiŋa.

⁸Sosor to muuŋ nditimbumai tigham di, ughur atia iza tiei malep. Lolom isamin ghei, ve rikia unum uul ghei. Pasa aazne, pataŋani tiina ivot payei, ve nisami wa.

⁹O Maaron, yom to Volaaŋa tiei. Uul ghei lak! Leso nipait izam pa tapirim ve poia tiom. Upas ghei nivot pa pataŋani tonene, ve ureu sosor tiei. Pasa, gabuam tovene. Tauto tamtoghon tipapait izam.

¹⁰Maaron, ighaze uul ghei maau, nene pale ndug ndug tisavia saveeŋ velegiiŋ payei tighaze: “Laak, Maaron tiam ineep sine?” Maaron, yes to tirab mbesooŋa tiom timatmaat, uyat ŋgar todi tonowen, ve nighita. Leso ndug ndug tiwatag tighaze yom ughur atia pa ŋgar samia.

¹¹Ulooŋ taŋiiz to yes to tineep ila koiadi nimadi. Tapirim tiina kat. Tovenen yes to koiadi tighaze tirab di timaat, ugham mulin di.

¹²O Maaron, ndug ndug tipiyaav saveeŋ velegiiŋ naol payom. Ŋgar todi tonowen, uyati le uyat katini.

¹³Ighaze ugham tovene, nene pale yei tamtoghon tiom lolomai poia payom, ve nipait izam pa poia tiom irau sawa isob. Pale nisavia uraat tiom itaghoni taghoni gha ila. Pasa, yei sipsip tiom, ve yom to ŋginiiŋ tiei.