Sam 78:52-72

⁵²Beto asa, si turaṉa vura ni Sa pa Izipi sari Nana tie guana sepati, meke turaṉa ene guni ni na rovana sipi Sa pa qega si arini.

⁵³Turaṉa va sarei Sa si arini, ke lopu matagutu si arini, ba sari na dia kana si va lodu matei Sa pa kolo.

⁵⁴Turaṉa va kamoi Sa si arini koasa Nana popoa madina, koasa toqere sapu ele vagia Sa pa vinaripera.

⁵⁵Hadu pani Sa sari na butubutu huporodi pa kenudi rina tie varipera Izireli, meke paqaha va hia poni Sa koari na butubutu tie sa popoa, meke sari na dia vetuvetu si poni ni Sa koari na Nana tie.

⁵⁶Ba bugoro nia ri Nana tie sa Tamasa Ululuna Hola, meke podepodekia rini si Asa. Lopu va tabei rini sari Nana tinarae,

⁵⁷ba bugoro nia rini meke lopu koa soto koa Sa si arini, gua tugo rina tamadia pukerane, lopu ta raṉe si arini kekeṉoṉo gua tugo na tupi kokoqina.

⁵⁸Va bugoria rini si Asa koari na dia vasina hopena pa toqere, meke vata ṉaziria rini si Asa koari na dia beku.

⁵⁹Sipu dogoria Tamasa sa dia tamasa huporona si ta ṉaziri si Asa, meke kilu pani hokari Sa sari Nana tie Izireli.

⁶⁰Muliṉi pani hokaria Sa sa dia vasina vina vukivukihi sapu pozana Saelo, sapu sa vasina pu koa ia Sa pa Ipi Hopena pa varikorapadi ri Nana tinoni.

⁶¹Va malumi Sa sari nada kana pude raovo vagia sa Bokese Tanisa Vinariva Egoi, sapu sa vina gilagilana sa Nana ṉiniraṉira na tinolava.

⁶²Bugoro ni Sa sari nana tie soti, meke va malumi Sa si arini pude tava mate koari na dia kana.

⁶³Sari na tie vaqura si tava mate pa vinaripera, ke lopu boka varihaba sari na tudia vineki.

⁶⁴Sari na hiama si tava mate, meke lopu tava malumu sari na nabokodi rini pude kabo pa tinalotaṉa.

⁶⁵Mumudi si turu mae gana sa Baṉara, guana tie vaṉununa, meke guana tie ṉiṉira sapu va ṉaliṉali ia pa ninapo vaeni.

⁶⁶Zukuru pule ni Sa sari Nana kana, meke va kilasa hokari Sa pa kinurekure loke vinabetona.

⁶⁷Ba etulu pani Sa sari na tutina e Zosepa; meke lopu vizati Sa sari na butubutu te Iparemi.

⁶⁸Ba vizatia tu Sa sa butubutu te Ziuda meke sa Toqere Zaione sapu qetu hola nia Sa.

⁶⁹Vasina si kuria Sa sa Nana Zelepade Hopena, kekeṉoṉo sa Nana vasina kokoana pa Maṉauru; sokirae va nabu nia Sa si asa, gua tugo na kasia popoa sapu koa hola ninae rane.

⁷⁰Vizatia Sa sa Nana nabulu Devita; vagi pania Sa si asa pa kinopudi rina sipi.

⁷¹Va betoa Sa si asa pa tinavete kopu sipi, pude Mani baṉara ni Sa sari Nana tinoni, pude Mani koa na Sepati si Asa koari na tie Izireli.

⁷²Kopu ni Devita sari na tinoni pa tinoṉoto, meke turaṉi Sa si arini pa nana binokaboka.