Sam 78:2-32

²Kaqu zama vura ni rau koari na vivinei vina tumatumae, pude va bakali ginuadi sari na tiṉitoṉa pu ele hola;

³Sari na tiṉitoṉa pu ele avosi gita, meke ele gilani gita, saripu ele totozini gita rina tamada.

⁴Lopu kaqu tomei gita si arini koari na nada koburu, ba kaqu totozi gita koari na sinage mae hire meke koari na tudia sari na tiṉitoṉa marilaedi, pu evaṉi e Zihova koasa Nana ṉiniraṉira lavata, meke sari na tiṉitoṉa variva magasadi pu evaṉi Sa.

⁵Poni ni Sa sari Nana tinarae koari na tie Izireli, meke sari na Nana Zinama koari na tutina e Zekopi. Totozi ni Sa sari kasa tiatamada pude di va tumatumae i sari na tudia,

⁶pude sa sinage luli mae sapu sari na koburu pu lopu podo si pude madi va nonogai, meke pude di totozi ni sari na tudia,

⁷pude madi boka va sotoa ri koe Tamasa sa dia rinaṉeraṉe, meke madi lopu muliṉi ni sari na tinavete te Tamasa, ba pude madi kopu ni sari na Nana tinarae,

⁸pude madi lopu gugua rina tamadia, na sinage va gugue na va karikari, sapu lopu soto va nabu sari na bulodia koe Tamasa, ke lopu ta ronu koe Tamasa sari na maqomaqodia.

⁹Sari na tie pa butubutu Iparemi sapu va namanamadi pude varipera meke paleke dia bokala na tupi si govete taloa pa vinaripera.

¹⁰Lopu kopu nia rini sa vinariva egoi te Tamasa; korodia va tabea rini sa Nana tinarae.

¹¹Muliṉi nia rini sapu gua tavetia sa Tamasa, meke sari na tinavete variva magasadi pu ele va dogoro ni Sa koa rini.

¹²Dogori ri na tiatamadia sari na tinavete variva magasadi pu evaṉi Sa pa popoa Izipi, pa pezara pozana Zoani.

¹³Varipaqaha nia Sa sa kolo, meke va ene karovi Sa si arini, meke va goba vekoa Sa sa kolo pa varikalidi.

¹⁴Pana rane si turaṉi Sa si arini koasa lei, meke pana boṉi si turaṉi Sa koasa nika huruṉuna.

¹⁵Viqali Sa sari na patu pa soloso qega, meke va totolo vura poni Sa sa kolo pa korapa pepeso.

¹⁶Va vura maei Sa pa patu sari na bukaha, meke va totolo gorei Sa guana ovuku.

¹⁷Gua asa, ba tavete nono la i tu rini sari na dia sinea koa Sa, meke pa soloso qega si bugoro nia rini si Asa sapu Ululuna Hola.

¹⁸Vizatia rini pa bulodia pude podekia sa Tamasa, koari na dia inokorodi rina ginani pu hiva ni rini.

¹⁹Zama ṉoṉovalia rini sa Tamasa, meke zama guahe si arini, “Vegua, boka ponini gita ginani sa Tamasa si gita pa korapa soloso qegana hie?

²⁰Gilania gami sapu ele sekea Sa sa patu meke puzaka vura mae sa kolo, meke totolo palapalae. Ba vegua, boka ponini ginani na masa kurukuru tugo Sa sari Nana tie?” gua si arini.

²¹Gua asa ke sipu avosia e Zihova sapu gua asa, si ta ṉaziri si Asa, ke huruṉu vura sa nikana sa Nana binugoro koari na tutina e Zekopi, meke sa Nana tinaṉaziri koe Izireli.

²²Sina lopu raṉea rini sa Tamasa, meke lopu kalavarae si arini koasa Nana ṉiniraṉira variharupi.

²³Ba zama ia Sa sa maṉauru meke ta tukele sari na sasadana, meke va gore maei Sa sari na ginani.

²⁴Meke va titisi gore la nia sa koa rini sa mana pude di henahena si arini.

²⁵Gua asa ke henai rini sari na ginani tana mateana.

²⁶Vata evaṉia Sa sa givusu pa kali gasa rimata pude hiru mae gua pa galegalearane, meke pa Nana ṉiniraṉira si va mae ia Sa sa givusu pa kali mae gua pa Izipi.

²⁷Va hoqa mae ni Sa pa maṉauru sari na kurukuru tapuru, gua tugo na kavuru, meke sari na kurukuru tapuru pu soku gua tugo na onone pa masa.

²⁸Va hoqa gorei Sa si arini pa varikorapadi rina dia ipi koasa vasina pu koa ia rini.

²⁹Henahena si arini meke deṉa utoṉo; ura poni ni Sa gua sapu okoro nia rini.

³⁰Ba sipu korapa henahena rini, meke lopu ele henahena beto ri,

³¹si ta ṉaziri ni sa Tamasa si arini, ke va mate pani Sa sari na dia tie ṉiṉiradi, meke va gore pani Sa sari na tie vaqura ta vizatadi pa Izireli.

³²Gua arini si ta evaṉa, ba tavete va sea nono latu si rini, dogori rini sari Nana tinavete variva magasadi, ba lopu hite raṉea rini si Asa.