3Totoso balabala ia rau sa Tamasa, ba lopu manoto si rau; totoso koa noso meke balabala si rau, si malohoro sari na qua binalabala.
4Peqa si rau doduru boṉi, talotaṉa hola si rau, pa qua tinalotaṉa si lopu gilania rau sapu sa si kaqu zama nia rau.
5Balabala i rau sari na rane pu ele hola, meke sari na vuaheni pukerane.
6Pana boṉi si balabala sisigiti pa buloqu si rau; noso meke balabala si rau, meke guahe si balabala ia rau:
7“Vea, kaqu etulu pani gami sa Baṉara si gami? Vea, lopu kaqu qetu pule hokara ni gami Sa si gami?
8Vea kokoi mo Sa Nana tataru nabuna koa gami? Vea sari nana vina tatara koa gami doduru totoso si beto mo?
9Vegua, ele muliṉi nia tu Tamasa si pude koa tataru na taleosae? Vegua, ele hobe nia tinaṉaziri tu Sa sa ṉinoṉo?”
10Meke zama si rau pa qua binalabala soti, “Sa ta sigiti hola nia rau si hie mo, sapu doṉo guana sa Tamasa Ululuna Hola si lopu tokani gami kamahire.”
11Kei Zihova, kaqu balabala i rau sari na Mua tinavete marilaedi, kaqu balabala pule la i rau sari na tinavete variva magasadi pu ele evaṉi Goi pukerane.
12Kaqu koa noso meke balabala va lohi la i rau sari doduru Mua tinavete, meke kaqu balabala i rau sari na Mua tinavete ṉiṉiradi variva magasadi.
13Kei Tamasa, hopedi meke viadi sari doduru Mua tinavete; loke tamasa pule si koa sapu noma hola kekeṉoṉo gua Agoi.
14Agoi mo sa Tamasa sapu taveti sari doduru tinavete variva magasadi, sapu vata dogoro nia sa Mua ṉiniraṉira koari na butubutu.
15Pa Mua ṉiniraṉira si harupi Goi sari na Mua tie, sari na tie te Zekopi meke na tutina e Zosepa.
16Kei Tamasa, sipu dogoro Igo rina kolo lamana si Goi, si guana tie matagutudi si arini. Uve sa lamana peava si holoqoru na neneqara.