3Tamasa hiva Nigo rau, pude na qua patu aqoroana si Goi na qua bara ṉiṉira pude harupau. Mu zama mae meke harupau, ura Agoi mo sa qua patu na bara aqoroana.
4Kei qua Tamasa, mu va sare au koasa ṉiniraṉira tadi na tie ṉoṉovala na tie kaleadi.
5Kei Baṉara, Agoi mo si aqa Nigo rau, Podalae sipu tie vaquraqu rau, si raṉe Igo rau Zihova.
6Kalavarae si rau koa Goi pa doduruna sa qua tinoa; podalae totoso podo rau, si koa Goi mo si ta kopue rau, kaqu vahesigo rau doduru totoso.
7Sa qua tinoa si na vina titila koari sokudi, sina Agoi tugo sa qua aqoroana.
8Doduru totoso si vahesigo rau, meke tozi vura nia rau sa Mua tinolava.
9Mu lopu etulu pani au, totoso barogoso si rau Mu lopu veko pani au, totoso malohoro si rau.
10Sari na qua kana si vari vivinei nau, na hiva va mate au rini
11Zama si arini “Lopu koa turaṉia Tamasa si asa kamahire, ke aria, mada hadu lulia, mada la tuqe vagia gana; loke tie si koa pude toka nia,” gua si arini.
12Kei Tamasa, Mu lopu koa va seu koa rau. Mu tuturei mae toka nau. Kei qua Tamasa!
13Madi tava kilasa, na tava nunala gedi sarini pu korapa podekia pude va mate au; madi tava kurekure, na talotaṉa gedi sarini pu korapa podekia pude va sigitau.
14Ba arau si lopu kaqu makudo sa qua rinoverove koa Goi, meke kaqu gigiri lala nana tu sa qua vinahesimu Goi.
15Kaqu tozi vura ni rau pa ṉuzuqu sari na Mua tinavete toṉotodi, ura na soku hola si arini, hola ni gua saripu boka gilani rau, ba kaqu zama vura ni rau doduru totoso sari na Mua tinavete variharupi.
16Zihova Tamasa; kaqu mae si rau pa Mua Zelepade pude vahesigo koari na Mua tinavete ṉiṉiradi. Kaqu vahesigo rau koasa Mua tinoṉoto soti telemu.
17Kei Tamasa, ele va tumatumae au Goi podalae sipu kobukoburuqu si rau. Ke lopu kaqu makudo tozi vura ni rau sari na Mua tinavete marilaedi na variva magasadi.
18Kei Tamasa, Mu lopu muliṉi nau sipu kamoa rau sa binarogoso meke keo sari na kaluqu. Mu koa koa rau osolae tozi vura nia rau sa Mua ṉiniraṉira koari na sinage na sage mae hiroi.
19Tamasa, sa Mua tinoṉoto si kamo la koari doduru vina podaka pa Maṉauru, ele taveti Goi sari na tinavete nomadi hola. Loke tie si hite pada kamo Igo si Agoi.
20Agoi va maei sari doduru tinasuna na tinasigiti pu raza koa rau, ba Agoi si kaqu toka nau pude koa valeana pule, ba Agoi tugo kaqu va sare au pa minate.
21Agoi tugo si kaqu va noma ia sa vina lavataqu, meke va manoto pule au.