Sam 69:4-6

⁴Sarini pu kukiti hoboro nau si soku hola, hola ni sari na kalu pa batuqu. Sari na qua kana si zutu au koari na dia zinama kokoha, ṉiṉira hola sarini pu hiva va mate au. Loketoṉa si hikoa rau, ba ososo nau rini pude vala pulei sari dia tiṉitoṉa pu hikoi rau, gua si arini.

⁵Kei Tamasa, gilana betoi Goi sari na qua kinaleadi, meke sari na qua dinuviduvili si lopu hite paere koa Goi.

⁶Kei Baṉara, Zihova Tadi na Qeto Minate, madi lopu tava kurekure pa ginuaqu rau sarini pu raṉe igo. Agoi Tamasa tadi pa Izireli, maqu lopu va kurekurei sarini pu va lavatigo.