Sam 69:13-30

¹³Ba arau si kaqu varavara atu koa Goi, kei Zihova. Kei Tamasa, pa totoso garona si mamu va tabe au koasa moatana gua sa Mua tataru nabuna, si Mu va gorevura ia sa Mua vina tatara meke harupau.

¹⁴Mu va sare au koasa pepeso kosirina, pude qu lopu mate. Mu va sare au koari na qua kana, meke koasa minate pa lamana.

¹⁵Mu lopu va malumi sari na tinasuna pude mae kuzu tamunau guana naqe; Mu lopu va malumau Goi pude lodu pa lamana, babe sa minate pude mae onolau, guana lovu.

¹⁶Kei Zihova, Mu olaṉau pa Mua tataru nabuna, pa korapa Mua tataru variva taleosae si Mamu mae toka nau.

¹⁷Mu lopu va paere pule Nigo koa sa Mua nabulu; Ura koa pa tinasuna si rau, ke Mu tuturei olaṉa mae au mo kamahire.

¹⁸Mu tuturei mae harupau, Mamu va sare au koari na qua kana.

¹⁹Gilani Goi sari na ṉinovaṉovalaqu, meke sa qua kinurekure na vina goregorequ, sari na qua kana si gilana betoi Goi.

²⁰Sari na ṉinovaṉovala si va talotaṉia sa buloqu, ke lopu toa valeana si rau. Ronua rau sa Mua tataru, ba loketoṉa. Hataia rau sa minanoto, ba loketoṉa tugo.

²¹Poni nau rini na ginani variva mate pude hena ia, meke sipu memeha rau si poni nau rini sa vaeni pasana.

²²Madi ṉovala pule ni teledia koari na gedi ginani, madi ta sekesekei pule ni teledia koari na dia inevaṉa vina vukivukihi.

²³Madi tava behu sari na matadi, pude di lopu dodogorae. Madi tavasigiti sari na mudidi!

²⁴Mu titisi la nia sa Mua binugoro koa rini, Mamu hadui gedi koasa Mua binugoro maṉinina osolae kamoi Goi si arini.

²⁵Madi tava ivulu sa dia vasina pu koa ia rini; madi mate eoṉo beto sarini pu koa koari na dia ipi.

²⁶Ṉoṉovali rini sarini pu va kilasi Goi, meke zama pesipesi rini sari na tinasigiti tadirini pu va bakorai Goi.

²⁷Mu varitomotomoi ni Goi sari na vina kilasadi, madi lopu somana vagia rini si keke hinia koasa Mua tinaharupu.

²⁸Madi ta huara palae pozadi si arini koasa buka tinoa; madi lopu ta kubere somana pozadi si arini koari na tie toṉoto.

²⁹Ba arau si koa ta sigiti, meke balabala mamata, kei Tamasa, Mu toka nau, Mamu harupau.

³⁰Kaqu kera la nia rau si keke kinera vinahesi koasa pozana sa Tamasa. Kaqu va lavatia rau si Asa pa qua zinama leana koa Sa.