Salmo 69:13-30

¹³Iyan, ed-ampù a ziyà te kenikew, Nengazen. Ne zeyzey ke zutun te timpu te kegkehizuwi nu en kedì, ne edtevaken nu is ampù ku tenged te zekelà he ǥaǥew nu kedì. Su metinumanen ka te saad nu te kedlibri,

¹⁴tevangi a para kenà a melenep diyà te vasak. Libriya a kenikew te menge edezaat kedì he iring te edlibriyen a kenikew ziyà te mezalem he wahig.

¹⁵Kenè nu ituǥut he mebpatey a tenged te kegketembuni kedì te menge vaǥel.

¹⁶Nengazen, tevaka a tenged te keupiya nu wey kebmahala nu kedì. Seǥipaa a tenged te zekelà he hizu nu kedì.

¹⁷Kena a kenikew elesi is suluǥuen nu. Tevaka ad kenikew ǥuntaan su melised is kebpekesavuk ku.

¹⁸Uvey ka kayi te kediey ne libriya a te kedezaat kedì te menge kuntada ku.

¹⁹Netuenan nu is kebpeel-elezi kedì, is ked-insultuwi kedì, wey is kedezeeti te zengeg ku. Neehè nu is langun he menge kuntada ku.

²⁰Inmesakit te ǥehinawa ku is kebpeel-elezi zan kedì ne mibmezaat is isip ku. Ebperetengen ku is kegkehizuwi kedì, piru wazà nehizu kedì. Ebperetengen ku is kedlipaya kedì, piru wazà midlipey kedì.

²¹Midsevukan dan hinuun te hilu is keenen ku, ne hein egkemezahan a, sukà is imbeǥey zan kedì.

²²Emun egastu sikandan, berakat he mehimu haazà he igkezeeti zan duma te menge meǥeliyug dan.

²³Berakat he mengelakap sikandan wey pen-elia.

²⁴Nengazen, ivusbus nu ziyà te kandan is pauk nu. Ipeǥezami nu kandan is rerangit nu.

²⁵Berakat he ewai zan en is ed-ubpaan dan wey wazè en dutun ed-ubpà.

²⁶Su ebpesipelahan dan is menge etew he edsilutan nu, ne idantal zan is kebpekebmereǥen dutun te midsilutan nu.

²⁷Ne iuman nu heeyan te menge salè dan ne kenè nu en sikandan libriya.

²⁸Penasa nu is menge ngazan dan diyà te libru he edlistahan nu te menge uuyag, ne kenè nu sikandan ilista zuma te menge metazeng.

²⁹He Megbevayà, nesekitan a wey nekaantus a, umbe levani a kenikew pinaaǥi te kedlibriya nu kediey.

³⁰Edeliǥen ku is Megbevayà pinaaǥi te kanta. Ibeǥey ku kandin is dengeg pinaaǥi te kebpeselamat ku.