Sam 5:7-10

⁷Ba arau si kaqu mae pa Mua Zelepade, koa gua koasa Mua tataru nabuna. Kaqu vahesigo rau pa korapana sa Mua Zelepade, kaqu todoṉo si rau pa korapa pinamaṉa Mu.

⁸Kei Zihova, Mu turaṉau pa korapa Mua tinoṉoto, sina sokudi saripu kukiti nau; va bakalia koa rau sa Mua hiniva, pude maqu lulia.

⁹Ura loke vasi hinokara si zama vura nia rini; ta siṉie kinaleadi mo sari na bulodi. Sari na leodi si ta siṉie sinekesekei pu variva mate. Zamazama va mememehe kokoha pa meadi si arini.

¹⁰Kei Tamasa, va kilasi gedi si arini, va hoqai gedi si arini koari na dia zinama soti teledia. Mu hitu pani gedi si arini pa kenumu Agoi, ura soku hola sari na dia sinea meke kana Igo rini.