Sam 56:8-13

⁸Gilani Goi sari na qua tinasuna, balabala i Goi sari na kolomataqu. Kuberi Goi si arini pa mua buka.

⁹Koasa rane pu tioko atugo rau, si kaqu kekere pule sari na qua kana. Gilania rau si hie, ura na somana koarau sa Tamasa.

¹⁰E Zihova sa Tamasa si vahesia rau koari Nana vina tatara.

¹¹Koa Sa si kalavarae rau ke lopu hite matagutu. Nasa si kote boka tavete nau rina tie?

¹²Kei Tamasa, maqu evaṉa vura ni sari na qua tinokotokoro. Maqu ponigo sari na qua vina vukivukihi zinama leana koa Goi.

¹³Ura ele va sare au Goi si rau pa minate, meke kopu ni Goi sari na nenequ pude lopu hoqa, pude qu ene pa kenumu Goi Tamasa pa korapa kalalasa.