Sam 44:4-19

⁴Agoi sina qua Baṉara meke na qua Tamasa. Meke Agoi si va mataqari sari na Mua tie,

⁵Pa Mua ṉiniraṉira Goi si va kilasi gami sari na mami kana, meke huara va ineti gami sarini pu ṉoṉovala gami.

⁶Lopu raṉea rau sa qua bokala, meke lopu boka harupau sa qua magu varipera si rau.

⁷Ba Agoi mo si harupu gami koari na mami kana, meke va kilasi Goi sarini pu kukitini gami.

⁸Ke kaqu vahesigo gami si Goi doduru totoso, meke kaqu zama leana si gami koa Goi ninae rane.

⁹Ba ele etulu pani gami tu Goi si gami, ke tava kilasa si gami koari mami kana, meke lopu somana ene luli si Goi koari na mami tie varipera.

¹⁰Ele va tarazuzu gami Goi, ke goveteni gami sari na mami kana, meke la rini meke zau vagi sari na mami likakalae.

¹¹Ele valani gami Goi si gami koari na mami kana, guana sipi pu ele ta vizata pude tava mate meke ta hena. Ele vata hurakatae lani gami Goi si gami pa seu koari na votiki butubutu.

¹²Ele holuholu ni Goi sari na Mua tie soti pa hinolu gorena sapu guana loke laemami si gami.

¹³Sari na tie pa votiki butubutu pu koa tata koa gami, si dogori rini gua sapu taveti Goi koa gami, meke va sisireni gami.

¹⁴Ele va evaṉaeni gami na vina sisireana Goi si gami koari na tie pa votiki butubutu. Hoke hiruhirue batudi si arini pana ṉoṉovala gami rini.

¹⁵Doduru rane si koa variva taru, na kurekure si rau,

¹⁶sipu avosi rau sari na zinama ṉoṉovalaqu koari na qua kana, meke koarini pu hiva tube au.

¹⁷Sari doduru tinasuna hire si ta evaṉa koa gami, ba lopu luara panigo gami si Goi, meke lopu va kari pania gami sa Mua vinariva egoi koa gami.

¹⁸Lopu hite etuligo gami si Goi, meke lopu hite sekea gami sa Mua tinarae.

¹⁹Ba ele veko pani gami tu Goi pa varikorapadi rina kurukuru pinomo, meke va opo tamununi gami Goi sa adumuna sa minate!