Sam 40:1-13

¹(Keke kinera te Devita) Aqa va ṉoṉo nia rau se Zihova, meke toka nau Sa. Doṉo mae au Sa meke avosia Sa sa qua tinepatepa.

²Va vura pule au Sa koasa pou gulazorona, meke koasa kopi kosikosirina. Va turu au Sa si rau pa keke vasina ṉiṉirana, ke lopu matagutu si rau pude hoqa pa tinasuna.

³Va tumatumae nau Sa si keke kinera vaqurana, na kinera vinahesina sa nada Tamasa. Pana avosia na dogoria rina tie si matagutu meke kekere, meke kalavarae koe Zihova.

⁴Tamanae tugo sa tie pu kalavarae koe Zihova, meke lopu luli rini saripu vahesi pule ni, meke sarini pu vahesi sari na tamasa kokohadi.

⁵Ke Zihova, mami Tamasa, soku hola sari na Mua tinavete pu tavete ponini gami Goi. Agoi mo sina Tamasa hinokara. Be hiva tozi rau sari na Mua tinavete koa gami, ba lopu boka tozi betoi rau, sina lopu boka ta nae si arini.

⁶Ba poni nau Goi sa taliṉaqu pude va avosigo, ke kamahire si gilania rau, sapu lopu hiva nia Goi sa vina vukivukihi na vinariponi pa hope, sa vina vukivukihi vina uququ babe na vina vukivukihi vinulasa sinea si lopu qetu nia Goi.

⁷Meke tiqe zama si rau, “Hiera si rau Qua Tamasa, gua sapu ta kubere sa guguaqu rau koasa buka ta viqusuna.

⁸Kei, qetu nia rau pude tavetia sapu gua hiva nia Goi. Gilana valeania na va naqitia rau sa Mua tinarae pa buloqu!”

⁹Ke Zihova, ele tozia rau pa vinarigara tinoni, sa inavoso leana sapu harupu gami Goi, meke gilania Goi sapu lopu makudo tozia rau si asa.

¹⁰Lopu tomea rau pa buloqu sa Mua tataru variharupi, ba tozi helahelae nia rau sa Mua tataru nabuna meke sa Mua hinarupu. Lopu tomea rau koari na tie pa vinarigara nomana sa Mua tataru nabuna na tinaharupu!

¹¹Zihova, hiva nia rau sapu lopu hite makudo sa Mua tataru variva taleosae koa rau. Mamu kopu nau na va sare au koasa Mua tataru nabuna ninae rane.

¹²Sari na tinasuna si varidikue nau, soku hola si arini meke lopu boka ta nae. Ta pusi si rau koari na qua sinea, ke lopu boka gilania rau sapu pavei si kote govete la gua rau. Soku hola ni rini sari na kalu pa batuqu, meke tava malohoro si rau.

¹³Ke Zihova, Mu harupau, Mamu va sare au, Mu tuturei toka nau, ba Zihova.