Sam 34:3-18

³Aria mada tozi vura nia sa vina lavatana e Zihova; mada keke gua vahesia sa pozana Sa!

⁴Tepa la ia rau se Zihova meke olaṉia Sa sa qua vinaravara; vata rupahau Sa koari doduru qua minatagutu.

⁵Sarini pu ta ṉoṉovala si kalavarae koa Sa meke koa qetu, lopu kaqu hite tava kurekure si arini.

⁶Koa pa tinasuna nomana si rau meke tepa la koe Zihova, meke avosau Sa si rau. Harupau Sa si rau koari doduru qua tinasuna.

⁷Sa mateana te Zihova si koa kapae meke kopu ni sarini pu pamaṉa nia si Asa, meke harupi Sa pa dia tinasuna.

⁸Podekia mamu tumae nia, sapu leana sa hahanana te Zihova. Qetu tugo si asa sapu kalavarae koa Sa.

⁹Mi pamaṉa nia se Zihova, gamu na tie toṉoto, ura sa tie sapu va tabea se Zihova si lopu kaqu ehaka nia keke tiṉitoṉa.

¹⁰Sari na laione si hoke malohoro na ovia, ba arini pu va tabea se Zihova si lopu ehaka nia si keketoṉa leana.

¹¹Ke gamu kasa na koburu, mi avoso mae au, maqu va tumatumaeni gamu sa pinamaṉana e Zihova.

¹²Esei gamu si okoro nia sa tinoa gelenaena meke sa kinoa learane, pude toa va gelenae nana pa qinetuqetu?

¹³Mamu kopu nia sa meamu, meke sa berumu, pude lopu zama va kaleana na zama kokoha.

¹⁴Luaria sa kinaleana, mamu tavetia gua sapu leana, mamu lopu makudo hata sisigitia sa binule koari na tie.

¹⁵Kopu ni e Zihova sari na tie toṉoto, meke va avosi Sa sari na dia tinepatepa.

¹⁶Ba kana i e Zihova sarini pu tavete va sea, pude va mate pani si arini meke lopu sana ta muliṉae palae si arini.

¹⁷Sari na tie toṉoto si tepa la koe Zihova, meke avosi Sa. Va sarei Sa koari doduru dia tinasuna.

¹⁸Koa tata se Zihova koarini pu koa talotaṉa sisigiti nia sa dia sinea, meke harupi Sa sarini pu lopu kalavarae pa dia binokaboka soti.