Sam 25:3-12

³(Gimel) Sarini pu kalavarae koa Goi si lopu kaqu tava kurekure, ba sari na tie va guguedi pa dia rinaṉeraṉe koa Goi si madi tava kurekure tugo.

⁴(Dalet) Ke Zihova, Mu va gilana nau sari na Mua hiniva, Mamu va tumatumae nau sari na Mua siraṉa.

⁵(He) Mu va tumatumae nau sa Mua hinokara, ura Agoi mo sa Tamasa, sa qua Hinarupu. (Vav) Koa Agoi mo si kalavarae si rau doduru totoso.

⁶(Zain) Kei Zihova, Mu balabala ia sa Mua tataru variva tukana, meke sa Mua tataru nabuna sapu ele vata dogoro nia Goi podalae mae gua pukerane.

⁷(Het) Mu taleoso nau koari na qua sinea na kinaleadi, pu evaṉi rau totoso tie vaqura si rau. Kei Zihova, Mu balabala au pa Mua tataru nabuna, sina leana si Goi koari na tie.

⁸(Tet) Toṉoto na ṉoṉo se Zihova, gua asa ke va tumatumae ni Sa koari na tie sea sari Nana siraṉa vasina kaqu ene si arini.

⁹(Yod) Turaṉi Sa si arini pu va pepekae koasa siraṉa toṉotona; va tumatumae nia Sa koa rini sa Nana hiniva pude lulia rini.

¹⁰(Kaph) Doduru totoso si turaṉi Zihova sari na tie koari Nana tataru nabuna meke na hinokara; ta ronuena si Asa koarini pu kopuni sari Nana vinariva egoi na tinarae.

¹¹(Lamed) Kei Zihova, Mu taleoso nau koari na qua sinea, koa gua koasa laena sa Pozamu, sina soku hola tugo sari na qua sinea.

¹²(Mem) Sarini pu pamaṉa nia se Zihova, si kaqu va tumatumaeni Sa sa Nana hiniva pude lulia rini.