Sam 18:42-48

⁴²Muzara va umumi rau si arini, guana kavuru pu givusu pani. Neti va konekonei rau si arini guana kosiri pa siraṉa.

⁴³Ele harupau Goi si rau koari na tie va karikaridi; meke ele va baṉara au Goi koari na butubutu, sari na tinoni pu lopu gilani rau, ba nabulu nau rini.

⁴⁴Sipu avoso nau rini si va tabe au rini. Sari na tie karovodi ba mae hoqa todoṉo pa kenuqu rau.

⁴⁵Matagutu hola meke neneqara mae si arini pa kenuqu rau. Tarazuzu meke vura mae si arini koari na dia vasina varipera ta bara va ṉiṉiradi.

⁴⁶Toana se Zihova! Mani tava lavata sa qua patu aqoroana! Maqu vahesia sa Tamasa, sa qua hinarupu!

⁴⁷Poni nau Sa sa minataqara koari na qua kana, toka nau Sa pude va kilasi sari na votiki butubutu.

⁴⁸Meke harupau Sa si rau koari na qua kana. Ke Zihova, Agoi va mataqarau si rau koari na qua kana. Meke lavelave hukata nau Goi koari na tie ṉoṉovala.