Sam 147:1-14

¹Mi vahesia se Zihova! Ura leana si pude kera vahesia sa nada Tamasa, ura na variva qetu meke toṉoto si pude vahesia si Asa.

²Kuri pulea e Zihova sa popoa Zerusalema. Turaṉa pule ni Sa saripu ta raovodi.

³Salaṉi Sa saripu talotaṉa pa bulodia, meke pusi i sa sari na bakoradi.

⁴Padai Sa sinokudi sari na pinopino, meke hopeke vala ni pozadi Sa si arini.

⁵Ululuna lavata na ṉiṉira hola se Zihova, meke loke tie boka pada ia sa Nana tinumatumae.

⁶Ovulu sage ni Sa saripu koa va pepekae puleni, ba va gore pani Sa sari na tie kaleadi.

⁷Mada kera vahesia se Zihova, vahesia sa nada Tamasa koari na kinera pa mike.

⁸Va neve i Sa pa maṉauru sari na lei, meke ponia ruku Sa sa pepeso, meke va toqoli Sa sari na duduli koari na toqere.

⁹Poni ni gedi ginani Sa sari na kurukuru ṉame, meke sari na tuna kurukuru tapuru totoso kabo ovia si arini.

¹⁰Sa Nana qinetuqetu si lopu koa koari na hose ṉiṉiradi, meke lopu variva qetu koa Sa sari na tie varipera varanedi,

¹¹ba qetu ni e Zihova sarini pu pamaṉa nia si Asa, meke sarini pu raṉea sa Nana tataru nabuna.

¹²Mi vahesia se Zihova, ke gamu na tinoni pa Zerusalema, mi vahesia sa mia Tamasa, ke gamu kasa pa Zaione.

¹³Va ṉiṉira i Sa sari na rorotoana koari na mia sasada bara, meke mana ni Sa sari na mia tinoni.

¹⁴Kopu nia Sa sa volosona sa mia popoa, meke poni va deṉa ni gamu huiti leadi hola Sa.