SALMOS 147:1-14

¹Xijpaquilismacaca TOTECO pampa nelía cuali para tihuicase tiohuicatl para ya. ¡Nelía yejyectzi huan quinamiqui!

²TOTECO sempa quicualtlalis altepetl Jerusalén, huan quinsentilis nopa israelitame catli quinsemanqui, huan itztoque ipan sequinoc tlalme quen seyoc tlali ehuani.

³Yaya quinyolchicahua catli quipiyaj yoltequipacholi huan quinpajtía campa mococojtoque.

⁴Yaya quimati quesqui imiyaca sitlalime onca huan sesen quintocaxtlalijtoc.

⁵Toteco nelía hueyi huan quipiya miyac chicahualistli. Itlalnamiquilis amo aqui hueli quitlamimachilía.

⁶TOTECO quinhueyitlalía catli moechcapanohuaj, pero nochi amo cuajcualme quintlahuisos tlalchi.

⁷Xihuicaca para anquitlascamatise TOTECO. Xihuicaca por nochi catli quichijtoc toDios huan xitlatzotzonaca ica arpa.

⁸Toteco yaya quitzacua nepa ilhuicactli ica mixtli. Yaya quichihua ma huetzi atl ipan tlaltipactli. Quichihua ma moscalti xihuitl ipan cuatitlamitl.

⁹Yaya quintlamaca nopa tecuanime catli nemij cuatitla. Ininpilconehua nopa cacalotl quintlamaca, quema pehuaj chocaj pampa mayanaj.

¹⁰Quema Toteco quiita se cahuayo catli motlalohua chicahuac, o quema quiita se tlacatl catli quipiya miyac fuerza, amo quipantía miyac paquilistli ipan ininchicahualis.

¹¹Pero TOTECO quipantía miyac paquilistli ipan masehualme catli quitlepanitaj. Quipantía miyac paquilistli ipan catli mochiyaj ipan ya iteicnelilis.

¹²Nochi amojuanti ipan ni altepetl Jerusalén, xijhueyimatica TOTECO. Quena, nochi catli itztoque ipan tepetl Sion, xijpaquilismaca amoDios.

¹³Pampa yaya cuali quitzactoc ipuertas amoaltepe para amo hueli quitlapos niyon se amocualancaitaca. Huan yaya tlahuel quintiochijtoc amoconehua.

¹⁴Yaya quititlanis tlasehuilistli ipan nochi amotlal, huan anmechmacas trigo catli más cuali para ica ximopanoltica.