Sam 139:14-23

¹⁴Vahesi Igo rau, sina garo pude ta pamaṉae si Goi. Sari doduru Mua tinavete si votikaedi hola, meke variva magasa. Gilana valeana au Goi si rau pa doduruna sa qua tinoa.

¹⁵Sipu ta varihodae valeana sari na susuriqu pa tiana sa tinaqu, meke sipu noma sage si rau pa vasina tomena, si ele gilanau tu Goi sapu koa si rau vasina.

¹⁶Sipu lopu ele podo rau, si ele dogorau tu Goi. Sari na ranena sa qua tinoa sapu poni nau Goi, si ele kubere betoi tu Goi pa Mua buka sipu lopu ele kamo si keke arini.

¹⁷Kei Tamasa, lopu boka tuma ni rau sari na Mua binalabala arilaedi, soku hola, lopu boka ta nae si arini.

¹⁸Be naei rau si arini, si soku hola ni rini sari na onone. Sipu vaṉunu rau, si korapa koa koa Goi si rau.

¹⁹Kei Tamasa, hiva hola nia rau si pude va mate pani Goi sari na tie kaleadi, meke sari na tie variva mate si madi taloa koa rau!

²⁰Soku tiṉitoṉa kaleadi si zama ni rini koasa guguamu Agoi; zama va kaleania rini sa Pozamu Goi.

²¹Kei Zihova, kukiti hola ni rau saripu kukiti Nigo! Etulu pani rau saripu varipera atu koa Goi!

²²Doduruna sa qua kinukiti si vala rau koa rini; balabala guni na qua kana rau si arini.

²³Kei Tamasa, Mu hata vura nia, Mamu gilana betoa sa buloqu! Mu podekau, Mamu gilani sari na qua binalabala!