Sam 119:63-171

⁶³Arau si na dia baere arini pu pamaṉa nigo, meke luli i sari na Mua vina tumatumae.

⁶⁴Kei Zihova, sa kasia popoa si siṉia na Mua tataru nabuna, Mu va tumatumae nau sari na Mua ginarunu.

⁶⁵Kei Zihova, ele kopu nia Goi sa Mua vina tatara, meke ele tavete va leana si Goi koa rau sa Mua nabulu.

⁶⁶Mu poni nau sa vinilavilasa va toṉoto meke sa tinumatumae. Ura va hinokari rau sari na Mua tinarae.

⁶⁷Sipu lopu ele va kilasa au Goi si hoke ene sea si rau, ba kamahire si va tabe i rau sari na Mua zinama.

⁶⁸Tavete valeana, meke tataru na vatukana si Goi, Mu va tumatumae nau sari na Mua ginarunu.

⁶⁹Saripu vahesi pule ni si totozi va hakehakei nau si rau, ba pa doduruna sa buloqu si va tabe i rau sari na Mua vina tumatumae.

⁷⁰Sari kasa tie sara si loke dia ginilagilana; ba arau si qetuqetu ni sari na Mua tinarae.

⁷¹Leana koa rau sa vina kilasaqu, sina gua asa meke boka va nonoga i rau sari na Mua ginarunu.

⁷²Leana hola koa rau sari na Mua tinarae, hola ni sari na tina qolo na siliva.

⁷³Agoi tavete au si rau, meke kopu nau Goi; Mu va tumatumae au pude qu tumae ni sari na Mua tinarae.

⁷⁴Sarini pu pamaṉa Nigo si kaqu qetu pana dogorau ri, sina kalavarae si rau koari na Mua zinama.

⁷⁵Kei Zihova, gilania rau sapu toṉoto sari na Mua vinilavilasa. Meke ta ronuena sa Mua vina kilasa koa rau.

⁷⁶Maqu koa manoto si rau koasa Mua tataru nabuna, gua sapu ele va tatara nia Goi koa rau sa Mua nabulu.

⁷⁷Mu tataru nau na taleoso nau, meke kaqu toa si rau, sina qetu ni rau sari na Mua tinarae.

⁷⁸Saripu vahesi pule ni si madi koa kurekure ni sari na dia zinutu kokoha koa rau; ba arau si kaqu balabala va lohi la i rau sari na Mua vina tumatumae.

⁷⁹Sarini pu pamaṉa Nigo si madi mae koa rau, pude madi gilani sari na Mua vina totolie.

⁸⁰Maqu va tabe valeana i sari na Mua ginarunu, pude qu lopu tava kurekure si rau!

⁸¹Kei Zihova ele mabo sa qua tinoa pa inaqamu Goi pude harupau; ba raṉea rau sa Mua zinama.

⁸²Ele mabo sari na mataqu na hakehakei Nigo rau koasa Mua vina tatara; nanasa guahe si rau, “Panavisa kaqu va manoto au e Zihova,” gua si rau.

⁸³Ele loke laequ mo si rau, gua tugo na ututuvuana kolo lulurana, ba lopu hite muliṉi ni rau sari na Mua ginarunu.

⁸⁴Ve seunae gua si kaqu aqa si rau? Panavisa kaqu va kilasi Goi saripu ṉoṉovalau?

⁸⁵Sari na tie vahesi puleni pu sekei sari na Mua tinarae si sekesekei nau, pude va hoqa au, gua.

⁸⁶Sari na Mua tinarae si ta ronuedi; sari na tie kaleadi si ṉoṉovala au pa kinohakoha, ke Mamu toka nau!

⁸⁷Tata hokara va mate au rini si rau, ba soto va nabu si rau koari na Mua vina tumatumae.

⁸⁸Koa sa Mua tataru nabuna si Mu va sare au pa qua tinoa, pude maqu va tabei sari na Mua vina totolie.

⁸⁹Kei Zihova sa Mua zinama si koa hola ninae rane; koa hola si asa pa maṉauru.

⁹⁰Kopu ni Goi sari na Mua zinama koari doduru sinage na sage, ele sokirae nia Goi sa pepeso meke koa hola si asa.

⁹¹Sari doduru tiṉitoṉa si koa hola kamoa pa rane ṉinoroi, sina koa gua koasa Mua zinama, meke sina na Mua nabulu sari doduru.

⁹²Be guana lopu sa Mua tinarae si na ṉatina sa qua qinetuqetu, si ele mate tu si rau koari na qua tinasigiti.

⁹³Lopu kaqu hite muliṉi ni rau sari na Mua vina tumatumae, ura koarini mo si poni nau Goi sa tinoa.

⁹⁴Tamugoi mo si rau, ke Mu harupau! Ura podekia rau pude kopu ni sari na Mua vina tumatumae.

⁹⁵Sari na tie kaleadi si korapa opo aqa nau pude va mate au, ba arau si korapa balabala va lohi la i rau sari na Mua vina totolie.

⁹⁶Ele gilania rau sapu sari doduru tiṉitoṉa si koa dia kokoidi, ba sa Mua tinarae si gotogoto puta.

⁹⁷Kei, tataru hola nia rau sa Mua tinarae! Balabala va lohi la ia rau si asa doduru totoso.

⁹⁸Sa Mua tinarae si koa koa rau doduru totoso, meke toka nau sa pude tumatumae hola ni sari na qua kana.

⁹⁹Gilagilana hola ni rau sari doduru qua tie va tumatumae, sina balabala va lohi la i rau sari na Mua vina tumatumae.

¹⁰⁰Tumatumae hola ni rau sari na tie koadi, sina va tabei rau sari na Mua tinarae.

¹⁰¹Va talevara ni rau sari doduru hahanana kaleadi, pude maqu boka kopu ni sari na Mua zinama.

¹⁰²Lopu hite kilu i rau sari na Mua tinarae. Ura na Agoi mo telemu sa qua tie va tumatumae.

¹⁰³Avoso lea koa rau sari na Mua zinama, lomoso hola nia sa sa namu zipale.

¹⁰⁴Vagi ni tinumatumae rau sari na Mua tinarae, gua asa ke hakohako ni rau sari doduru hahanana seadi.

¹⁰⁵Sa Mua zinama si na zuke pa nenequ, meke na kalalasa pa qua siraṉa.

¹⁰⁶Ele tokotokoro nia rau sa qua vina tatara, pude va tabe i sari na Mua tinarae toṉotodi.

¹⁰⁷Kei Zihova, ta sigiti hola si rau, Mu va sare au pa minate, gua sapu ele va tatara nia Goi.

¹⁰⁸Mu va egoa sa qua vinahesi pu poni Igo rau, kei Zihova, Mamu va tumatumae nau sari na Mua tinarae.

¹⁰⁹Vala ia rau pa tinasuna sa qua tinoa doduru totoso, ba lopu muliṉi nia rau sa Mua tinarae.

¹¹⁰Sekesekei nau rina tie kaleadi pude va mate au, gua; ba lopu hite sekei rau sari na Mua vina tumatumae.

¹¹¹Sari na Mua vina totolie si na qua vinagi ninae rane ka rane, arini tugo si na qua qinetuqetu pa buloqu.

¹¹²Ele vizatia rau si pude va tabei sari na Mua ginarunu osolae beto sa qua tinoa.

¹¹³Kukiti ni rau sarini pu ruarabeke pa dia sinoto koa Goi, ba tataru nia rau sa Mua tinarae.

¹¹⁴Agoi si na qua tinokae meke na qua lave. Raṉei rau sari na Mua zinama.

¹¹⁵Mi taloa koa rau gamu doduru pu tavete va kaleana. Arau si kaqu va tabe i sari na tinarae tanisa qua Tamasa.

¹¹⁶Mu poni nau sa ṉiniraṉira, gua sapu ele va tatara nia Goi, pude maqu toa; Mu lopu va kurekure au pa qua rinaṉeraṉe!

¹¹⁷Mu tuqe au, pude maqu koa tava sare, pude maqu koa va avosi sari na Mua ginarunu doduru totoso.

¹¹⁸Kilu pani Goi sari doduru pu sekei sari na Mua vina totolie; sari na dia tinavete sekesekeidi si loke laedi.

¹¹⁹Tavete guni na remoremo Goi sari na tie kaleadi, gua asa ke tataru ni rau sari na Mua vina totolie.

¹²⁰Matagutu Nigo rau si Goi; matagutu sisigiti si rau, sina koa gua koari na Mua vinaripitui.

¹²¹Ele evaṉia rau gua sapu toṉoto meke leana, Mu lopu luara vala au koarini pu ṉoṉovalau.

¹²²Mu va tatara nau sapu kaqu toka nau Goi si rau sa Mua nabulu; Mu lopu va malumi sari na tie huporo pude ṉoṉovalau.

¹²³Mabo sari na mataqu na hakehakei nia sa Mua tinaharupu, meke sa vina gorevurana sa Mua vina tatara toṉotona.

¹²⁴Mu toka nau, arau sa Mua nabulu koasa Mua tataru nabuna, Mu va tumatumae nau sari na Mua ginarunu.

¹²⁵Arau si na Mua nabulu, Mu poni nau sa ginilagilana, pude maqu tumani sari na Mua vina totolie.

¹²⁶Kei Zihova, hie sa Mua totoso pude va kilakilasa, sina korapa sekea rina tie sa Mua tinarae.

¹²⁷Tataru ni rau sari na Mua tinarae hola nia sa qolo, meke sa qolo sapu ele tava viana.

¹²⁸Gua asa ke luli i rau sari doduru Mua vina tumatumae. Hakohako ni rau sari doduru hahanana seadi.

¹²⁹Marilaedi hola sari na Mua vina totolie, gua asa ke kopu ni rau si arini.

¹³⁰Sa vina bakaladi rina Mua vina tumatumae si va mae ia sa kalalasa. Meke ponia sa sa ginilagilana koari pu pupuhu.

¹³¹Popa leo si rau, ura memeha ni rau sari na Mua tinarae.

¹³²Mu mae koa rau, Mamu tataru nau, Mamu taleoso nau, gua sapu tavete ni Goi saripu tataru nia sa Pozamu.

¹³³Kopu nau pude maqu lopu hoqa pa sinekedi sari na Mua tinarae, Mu lopu va malumau pude tava kilasa koa sa kinaleana.

¹³⁴Mu va sare au koari pu ṉoṉovalau, pude maqu va tabei sari na Mua tinarae.

¹³⁵Mu mana nau pa Mua sinomana koa rau, Mamu va tumatumae nau sari na Mua vina totolie.

¹³⁶Guana titisi sari na kolomataqu, sina kilui rina tie sari na Mua tinarae.

¹³⁷Kei Zihova, toṉoto si Goi, meke sari na Mua tinarae si toṉoto tugo.

¹³⁸Sari na Mua vina totolie pu taveti Goi, si leadi hola pa doduru tie.

¹³⁹Sa qua binugoro si maṉini pa buloqu guana nika, sina kilu i rina qua kana sari na Mua zinama.

¹⁴⁰Hinokara hola sa Mua vina tatara, meke qetu hola nia rau na Mua nabulu si asa.

¹⁴¹Lopu arilaequ, meke ta kiluqu si rau, ba lopu hite muliṉi ni rau sari na Mua tinarae.

¹⁴²Sa Mua tinoṉoto si toṉoto ninae rane, meke sa Mua tinarae si hinokara doduru totoso.

¹⁴³Tinasuna na tinalotaṉa si raza koa rau, ba sari na Mua tinarae si variva qetu koa rau.

¹⁴⁴Sari na Mua vina totolie si toṉoto ninae rane. Mu poni au sa ginilagilana pude maqu toa si rau.

¹⁴⁵Kei Zihova, tepa atu si rau koa Goi pa doduruna sa buloqu! Mu va tabe au, meke kaqu kopu ni rau sari na Mua ginarunu.

¹⁴⁶Tepa atu si rau, Mu harupau, meke kaqu va tabei rau sari na Mua vina totolie.

¹⁴⁷Pana vaqavaqasa si vaṉunu si rau, meke tepa atua sa tinokae; raṉei rau sari na Mua zinama.

¹⁴⁸Peqa nia rau doduru boṉi hoke balabala va lohi la i rau sari na Mua vina tatara.

¹⁴⁹Kei Zihova, sa Mua tataru si nabuna, ke Mu avoso mae au, Mu kopu nia sa qua tinoa, pa Mua tinoṉoto

¹⁵⁰Korapa nono mae sarini pu ṉoṉovalau, sarini pu lopu kopukopu ni sari na Mua tinarae.

¹⁵¹Ba korapa koa tata si Goi koa rau, Kei Zihova, sari doduru Mua tinarae si hinokara.

¹⁵²Pukerane tu si ele va nonoga i rau sari na Mua vina totolie, meke gilania rau sapu ele va turu i Goi ninae rane.

¹⁵³Mu doṉo mae au koasa qua tinasigiti, Mamu va sare au, ura na lopu kilu pani rau sari na Mua tinarae.

¹⁵⁴Mu lavelave hukata nau pa qua tinoa, Mamu vata rupahau pa tinasuna, na harupau gua sapu ele va tatara nia Goi.

¹⁵⁵Sari na tie kaleadi si lopu kaqu ta harupu, sina lopu kopu ni rini sari na Mua ginarunu.

¹⁵⁶Ba noma hola sa Mua tataru va tukana Goi Zihova, Mu harupau pa Mua vinilasa toṉotona.

¹⁵⁷Soku hola sari na qua kana pu ṉoṉovala au, ba lopu hite malohoro si rau pa kinopudi rina Mua tinarae.

¹⁵⁸Etulu pani rau sari kasa tie ṉoṉovala sara, sina lopu kopu ni rini sari na Mua tinarae.

¹⁵⁹Mu balabala ia sapu gua qetu guni rau sari na Mua vina totolie! Mu kopu nia sa qua tinoa koasa Mua tataru nabuna.

¹⁶⁰Sari doduru zinama Tamugoi si hinokara, meke sari doduru mua tinarae toṉotodi si koa hola ninae rane.

¹⁶¹Sari na koimata si ṉoṉovala hoborau rini, ba pamaṉa nia rau sa Mua zinama.

¹⁶²Qetuqetu hola qua tu, sina koa gua koari na Mua vina tatara. Sa qua qinetuqetu si gua tugo tadi pu vagia si keke tinago leleana.

¹⁶³Hakohako hola ni rau sari na kinohakoha, ba qetu nia rau sa Mua tinarae.

¹⁶⁴Ka zuapa totoso pa keke rane si vahesigo rau, koari na Mua tinarae toṉotodi.

¹⁶⁵Sarini pu qetu nia sa Mua tinarae si koa va bulebulei; meke loketoṉa si kaqu boka va hoqai si arini.

¹⁶⁶Kei Zihova, raṉea rau sa Mua tinaharupu, meke va tabe i rau sari na Mua tinarae.

¹⁶⁷Va tabe i rau sari na Mua vina totolie, sina qetu ni rau si arini pa doduru buloqu.

¹⁶⁸Va tabe i rau sari na Mua tinarae na vina totolie, ura gilani Mua Goi sari doduru qua hahanana na tinavete.

¹⁶⁹Kei Zihova, mani kamo atu koa Goi sa qua tinepa tinokae; Mu va tumatumae au, gua sapu ele va tatara nia Goi.

¹⁷⁰Mamu va avosia sa qua vinaravara, gua sapu ele va tatara nia Goi.

¹⁷¹Kaqu vahesigo rau si Goi doduru totoso, sina va tumatumae nau Goi sari na Mua ginarunu.