SALMOS 92:4-15

⁴NoTeco Dios, ta nelía techchihuilijtoc miyac tlamantli catli cuali, huan techchijtoc ma nipaqui. Yeca nihuica ica miyac paquilistli.

⁵¡TOTECO, ta tijchihua huejhueyi tiochicahual nextili! ¡Huan motlalnamiquilis amo aqui hueli quimachilía!

⁶Nopa masehualme catli huihuitique amo quimatij niyon amo quimachilíaj.

⁷Masehualme catli fiero ininnemilis motlananaj huan mohueyichihuaj ica tlamantli catli amo cuali, pero amo quimatij para teipa quintzontlamiltise huan ayacmo quema motlananase.

⁸Pero ta tiTOTECO, mitzhueyitlalijtose para nochipa pampa ta tiDios Catli Más Hueyi.

⁹Xiquita nica itztoque mocualancaitacahua pero nojquiya nica tiquintzontlamis. Quena, TOTECO, nochi masehualme catli quichihuaj catli amo cuali, ta tiquinsemanas.

¹⁰Pero techmacas na chicahualistli quen se toro catli nemi cuatitla. Huan sempa techaltis ica moaceite catli temaca yancuic chicahualistli.

¹¹Niquitas quenicatza tiquintzontlamis nocualancaitacahua. Huan nijcaquis quenicatza quintzontlamise nopa tlaixpanoca tlacame catli motlanantoque ica na.

¹²Pero catli itztoque xitlahuaque iixpa Toteco quipiyase chicahualistli. Inijuanti yejyectzitzi quen ixochiyo apachi cuahuitl. Mohueyichihuase quen nopa tiocuame catli onca ipan tlali Líbano.

¹³Masehualme catli cuajcualme quipiyase chicahualistli quen cuame catli quintoctoque ipan ichaj TOTECO, huan Toteco Dios yaya quinmocuitlahuis.

¹⁴Huan quema nopa cuajcualme huehuejtiyase, noja quipiyase fuerza. Itztose quen cuame catli temacase inintlajca, huan nochipa xoxohuixtose.

¹⁵Huan ya nopa quinextis para TOTECO catli nechmocuitlahuía quichihua catli melahuac. Nochipa yaya xitlahuac tetlajtolsencahua.