SALMOS 92:4-15

⁴NoTeco Dios, ta nelía techchihuilijtoc miyac tamanti cati cuali, huan techchijtoc ma nipaqui. Yeca nihuica ica miyac paquilisti.

⁵¡TOTECO, ta tijchihua huejhueyi tiochicahualnescayot! ¡Huan motalnamiquilis amo aqui hueli quimachilía!

⁶Nopa masehualme cati huihuitique amo quimatij yon amo quimachilíaj.

⁷Masehualme cati fiero ininemilis motananaj huan mohueyichihuaj ica tamanti cati amo cuali, pero amo quimatij para teipa quintzontamiltise huan ayecmo quema motananase.

⁸Pero ta tiTOTECO, mitzhueyitalijtose para nochipa pampa ta tiDios Cati Más Hueyi.

⁹Xiquita nica itztoque mocualancaitacahua, pero nojquiya nica tiquintzontamiltis. Quena, TOTECO, nochi masehualme cati quichihuaj cati amo cuali, ta tiquinsemanas.

¹⁰Pero na techmacas chicahualisti quej se toro cati nemi cuatita. Huan sempa techaltis ica moaceite cati temaca yancuic chicahualisti.

¹¹Niquitas quenicatza huetzise nocualancaitacahua. Huan nijcaquis quenicatza quintzontamiltise nopa taixpanoca tacame cati motanantoque ica na.

¹²Pero cati itztoque xitahuaque iixpa Toteco quipiyase chicahualisti. Elise cuajcualtzitzi quej ixochiyo apachijcuahuit. Mohueyichihuase quej nopa tiocuame cati onca ipan tali Líbano.

¹³Masehualme cati cuajcualme quipiyase chicahualisti quej cuame cati quintoctoque ipan ichaj TOTECO, huan Toteco Dios yaya quinmocuitahuis.

¹⁴Huan quema nopa cuajcualme huehuejtiyase, noja quipiyase fuerza. Itztose quej cuame cati temacase inintajca, huan nochipa xoxohuixtose.

¹⁵Huan ya nopa quinextis para TOTECO cati nechmocuitahuía quichihua cati melahuac. Nochipa yaya xitahuac tetajtolsencahua.