SALMOS 85:2-11

²Tiquinquixtili inintaixpanolhua nochi momasehualhua. Quena, tijtalpacho nochi inintajtacolhua.

³Timoyoltali ica tojuanti huan ayecmo tahuel ticualantoc.

⁴NoTeco Dios, ta cati titemaquixtía, ama xijchihua para sempa ma timitzicnelica para ayecmo quema techajsis mohueyi cualancayo.

⁵¿O huelis tijsenhuiquilis ticualantos ica tojuanti para nochipa? ¿O huelis tijhueyilis mohueyi cualancayo para nochi xihuit?

⁶Toteco Dios, sempa techtanana, huan tojuanti timomasehualhua sempa timopaquilismacase ipan ta.

⁷TOTECO, technextili mohueyi taicnelilis, huan techmaquixti.

⁸Na nijtacaquilijtoc nochi cati quiijtohua TOTECO Dios, pampa yaya quincamanalhuis itatzejtzeloltica masehualhua cati quintapejpenijtoc. Huan cati quiijtos quinmacas tasehuilisti ipan iniyolo, para inijuanti ma ayecmo mocuepaca ipan nopa ojti ten huihuiyot campa nemiyayaj ipan tajtacoli.

⁹Melahuac Toteco Dios itztoc nechca para quinmaquixtis masehualme cati quitepanitaj huan quiimacasij quiixpanose. Se tonali ihueyitilis Toteco quitemitis total.

¹⁰Campa hueli oncas taicnelijcayot huan cati melahuac. Campa hueli nochi quimatise para quichihuase nochi cati xitahuac huan quej nopa oncas tasehuilisti campa hueli.

¹¹Cati melahuac elis campa hueli ipan taltipacti, huan yaya cati senquisa xitahuac hualtachixtos ten nepa ilhuicac huan paquis ica cati quiitas.