Salmo 85:2-11

²Mibpesaylu nu is menge salè dey; ne in-awè nu en diyà te isip nu.

³Wazè key en kenikew mepeuki.

⁴He Megbevayà he menluluwas dey, ilikù nu kayi te kenami is meupiya he kebpekesavuk dey. Iawè nu en is pauk nu kenami.

⁵Taman te taman en be is kegkepeuki nu kenami?

⁶Kenè be egkehimu ke idlikù nu kayi te kenami is meupiya he kebpekesavuk dey su wey key melipey tenged kenikew?

⁷Nengazen, ipeehè nu kenami is kebmahala nu kenami ne libriya key.

⁸Ebpemineǥen ku is egkeǥiyen te Nengazen he Megbevayà, su ibpenaad din diyà te kenitew te metinumanen he menge etew zin is meupiya he kebpekesavuk; emun kenè tew edlikuan is tinulebung he menge vaal tew.

⁹Tutuu iyan he edlibriyen din is menge etew he edtahud kandin su para metuusi he kemulu edterebahu is gehem din kayi te tanè tew.

¹⁰Ebpekeduma is gaǥew wey kebmetinumanen, ne ebpekeduma zaan is ketazeng wey is kelinew.

¹¹Is kebmetinumanen te etew kayi te tanà ne netuenan te Megbevayà diyà te langit. Ne is ketazeng te Megbevayà diyà te langit egkezawat te etew kayi te tanà.