SALMOS 68:10-33

¹⁰Yeca momasehualhua mocajque nica ipan ni tlali. Huan ta ica motlaicnelijcayo tiquinmacac nopa teicneltzitzi nochi catli monequiyaya para ica mopanoltise.

¹¹Toteco quiijto para ya tlatlantoya, huan miyac masehualme tzajtzique chicahuac para tepohuilise catli panotoc. Quiijtojque:

¹²“Cholojtejque nopa soldados catli hualajtoyaj para techtzontlamiltise.” Quena, ama nopa israelita sihuame momajmacaj nochi tlamantli catli quicajtejque nopa soldados.

¹³Xiquitaca, masque quinmocuitlahuiyayaj borregojme, ama nopa sihuame hasta petlanij ica oro huan plata. Nochi inintlacayo quitlamitzactoque ica tlamantzitzi catli yejyectzitzi quen se paloma quitlamitzacua itlacayo ica ieltlapal.

¹⁴Toteco Dios Catli Quipiya Nochi Chicahualistli quinsemanqui icualancaitacahua quen nopa setl catli huetzi ipan tepetl Salmón.

¹⁵Nochi nopa tepeme catli huejcapantique catli mopantíaj ipan tlali Basán iaxcahua Toteco huan nelía yejyectzi inintzonatipa,

¹⁶pero ma amo mochicoitas ica nopa Tepetl Sion catli TOTECO quitlapejpenijtoc para ipan itztos para nochipa.

¹⁷Toteco Dios quisqui ipan tepetl Sinaí ica millones icuacarros huan itequihuajcahua. Yaya yajqui ipan itiopa catli tlatzejtzeloltic ipan tepetl Sion.

¹⁸Quema Toteco tlejcoc ilhuicac campa más huejcapa, quichihuayaya quen se tlatlanquetl catli mocuepa ipan se tlahuilancayotl, huan quinhuicac ilpitoque nopa masehualme catli quintlantoya para iaxcahua. Huan nopa tonal Toteco quiseli nemactli tlen nochi masehualme, hasta nojquiya masehualme catli amo quinejque quitlepanitase. Huan ama TOTECO temachtli itztos ica tojuanti.

¹⁹Ma tijpaquilismacaca Toteco, pampa yaya mojmostla techmaca itlatiochihualis. Yaya Toteco catli techpalehuía huan techmaquixtía.

²⁰Toteco Dios, yaya catli techchololtía ininmaco tocualancaitacahua. Huan yaya Toteco catli techmanahuía para amo timiquise.

²¹Temachtli Toteco quintzontlamiltis nochi icualancaitacahua, pampa inijuanti tlahuel yoltetique huan amo quinequij quicahuase inintlajtlacolhua.

²²Toteco quinilhuijtoc imasehualhua: “Na niquinhualicas nochi amocualancaitacahua. Niquincuiti masque motlatijtose ipan nopa huejcapantic tepetl catli itoca Basán, o masque motlatijtose hasta tlatzintla tlen nopa hueyi atl.

²³Niquinhualicas pampa monequi nochi anquintzontlamiltise. Inieso quixolonise amoicxihua huan amochichihua quipipitzose.”

²⁴NoTeco Dios, tinotlanahuatijca, niquinita miyac masehualme mitztoquilíaj para yase ipan motiopa.

²⁵Inijuanti catli huicaj tlayacantiyohuij. Tlatlajco yohuij nopa ichpocame catli quitzilinijtiyohuij panderos. Tlatepotzco yohuij catli tlatzotzonaj.

²⁶Huan quej ni huicaj: “Nochi anisraelitame, xijhueyimatica Toteco Dios. Xijpaquilismacaca Toteco catli techmacatoc nemilistli nochi tojuanti.”

²⁷Tlayacantiyohuij iixhuihua Benjamín. Huan tlatepotzco hualahuij nopa tlayacanani huan huehue tlacame tlen iixhuihua Judá, huan nopa tlayacanani catli iixhuihua Zabulón huan Neftalí.

²⁸Toteco Dios, ica mohueyi chicahualis xijchihua nochi catli techilhuijtoc. Quena, xijnexti mohueyi chicahualis para sequinoc ma quiitaca nopa huejhueyi tlamantli catli ta techchihuilijtoc.

²⁹Nopa tlanahuatiani tlen nochi tlalme quihualicaj iniofrendas ipan motiopa catli eltoc ipan altepetl Jerusalén.

³⁰Toteco Dios, xiquinajhua tocualancaitacahua. Xiquinechcapantlali nopa tlacame catli mosisiníaj quen torojme, huan xiquinchihua ma motemactilica ica ta. Ma mitzhualiquilica inintepos plata quen se nemactli. Xiquinsemana nopa mosisinijca masehualme catli tlahuel quinpactía tlahuilanase.

³¹Nopa Egipto ehuani quinhualicase inintelpocahua huan nochi tlamantli ininteposhua catli yejyectzitzi huan pajpatiyo. Huan nopa Etiopía ehuani momatlananase moixpa para mitzhueyichihuase.

³²Nochi antlanahuatiani ipan nochi ni tlaltipactli, xijhuicatica Toteco Dios. Xihuicaca huan xijpaquilismacaca Toteco.

³³Yaya catli nentinemi ipan nopa ilhuicactli catli hasta huejcajya eltoc. Xijcaquica itoscac catli chicahuac caquisti quen quema tlatomoni.