A Umana Kakailai 68:10-33

¹⁰Kaum kor na tarai dia tar ki tana; Ta kaum varmari, God, u ga vanvaninare ra magit ure ra umana biaui.

¹¹A Luluai i tul tar ra tinata, A ngala na kor na vaden dia varvarvai.

¹²A umana king kai ra lavur loko na tarai na vinarubu dia takap, dia takap; Ma ra vaden ba dia ki ka ra kuba i diat dia tibe ra tabarikik di rara pa ia.

¹³Ba ava va livuan ta ra umana kikil na sip, I da ra bebea i ra uka i bagabagele da ra silva, Ma ra ivuna i gobol da ra goled.

¹⁴Ba ra Dekdek Muka i ga korot varbaiane ra umana king tana, I ga da ra bata i pua aro Salmon.

¹⁵A luana Basan ia ra luana kai God; A luana Basan i manga tuluai urama.

¹⁶Avat a umana luana ba ava manga tuluai urama, ta ra ava ava matana varpin, Ure ra luana vang, nina God i ga pilak pa ia ba na ki tana? Maia, ra Luluai na ki tana pa na mutu.

¹⁷A umana kiki na vinavana kai God dia peal na kaia, Maia, a umana arip na marmar ma ta umana arip na marmar mulai. A Luluai i ki livuan ta diat, Sinai i ki ta ra pal tabu.

¹⁸U tar tutua urama, u tar ben vavilavilau ra kini na vilavilau; U tar alube pa ra vartabar tai ra tarai; Maia, ta diat bula ra umana tena varongongoi, upi ra Luluai God na ki pire diat.

¹⁹Da pite pa ra Luluai, nina i puak pa kada kinakap ta ra bungbung par, Maia, da pite pa God nina i valavalaun dat. Sela.

²⁰God ia ra God na maramaravut pire dat. Ma i tale ra Luluai God ba na tul tar ta nga da pila kan ra minat i tana.

²¹Ma God na pamar ra lor i kana lavur ebar, Ma na kutu vue ra tagal a ulu i diat dia papait vatikene kadia varpiam.

²²A Luluai i biti: Ina vatalil diat maro Basan, Ina vatalil diat mara ra marumian na ta;

²³Upi una puk ra kaum ta ra gapu i kaum lavur ebar, Upi ra karamea i kaum lavur pap diat a vatur vake kadia tiniba tana.

²⁴God, di tar gire kaum vinavana, Maia, ra vinavana kai kaugu God, kaugu King, ba i ruk ra pal tabu.

²⁵A umana tena kakailai dia vana na lua, a umana tena ubuubu pagol dia murmur; Diat ma ra umana inip na vavina ba dia par ra kudu.

²⁶Avat a pite pa God ta ra lavur kivung na tarai, Maia, avat ava tamana ma Israel, avat a pite pa ra Luluai.

²⁷Beniamin ra ikilik akari kadia tena varkurai, A umana luluai Iuda ma kadia kivung, A umana luluai Sebulun, ma ra umana luluai Naptali.

²⁸God, una vaarike ra dekdekim, God, una ongor, u ba u ga papalum maravut avet;

²⁹Tago ure kaum gomgom na pal arama Ierusalem, A umana king diat a kap tabar u.

³⁰Una bor bat ra umana kaina leing ta ra pupui, A kor na bulumakau ma ra umana nat na bulumakau kai ra tarai, Nina dia rua vakavakaina ra lavur pakana silva; Una korot varbabaiane ra lavur vuna tarai dia gugu ta ra vinarubu.

³¹A umana luluai diat a vana rikai maro Aigipto; Etiopia na tulue lolole pa ra limana upi God.

³²Avat a umana vuna gunan ta ra rakarakan a gunagunan, avat a kakailai tadav God; Avat a kakailai na pite varpa tadav ra Luluai; Sela.

³³Tadav nina i vutvut arama liu iat ra ul a bakut, nina ba amana iat i tana; Ea, i tata, ma i ngala tuna ra nilaina.