SALMOS 59:9-17

⁹NoTeco Dios, pampa nocualancaitacahua quipiyaj chicahualistli, ipan ta nimotemachis, pampa ta catli techmanahuía.

¹⁰NoTeco Dios, ta nochipa techicnelijtoc miyac, yeca nijmati para temachtli techyacantiyas. Tijchihuas ma niquitas catli tlahuel nijnectoc ma ininpanti nocualancaitacahua.

¹¹NoTeco, ta catli techmanahuía, amo xiquinmicti nimantzi ni nocualancaitacahua, pampa huelis ni nomasehualhua nimantzi quielcahuase catli ininpantis nopa mosisinijca masehualme. Más cuali san xiquinsemana ica mohueyi chicahualis huan xiquinechcapantlali.

¹²Quena, xiquintlatzacuilti pampa nochi inijuanti tlahuel istlacatij, mohueyimatij huan tlatelchihuaj.

¹³Xiquintzontlamilti ica mohueyi cualancayo, huan xiquintlamiixpolihuilti. Huan quej nopa nochi masehualme quimatise para ta, Toteco Dios, titlanahuatía ipan tlali Israel, huan ipan nochi tlaltipactli.

¹⁴Nocualancaitacahua mocuepaj ica tiotlac huan tzajtzij quen chichime, huan quiyahualojtinemij ni altepetl.

¹⁵Nentinemij campa hueli para quitemojtinemise inintlacualis. Huan quema amo ixhuise, tzajtzij seyohual quen chichime.

¹⁶Pero na sesen ijnaloc nihuicas ica nopa chicahualistli catli techmaca. Huan nimitzhueyimatis pampa techtlasojtla miyac. San ta techmanahuía huan san ipan ta nimotemachía, quema huala tlaohuijcayotl.

¹⁷Toteco Dios, momaco ta niitztoc temachtli, yeca nimitzhueyimatis huan nihuicas para ta, pampa san ta techmocuitlahuía huan techicnelía.