1Godanya nganampa ngalkilpa nyinanyi kuṉpu puḻka. Munu nganampa tjituṟu-tjituṟu kura puḻka wirkankunyangka paluṟu ilaṯu ngaṟapai nganaṉanya kurunpa rapantjikitja.
2Palulanguṟu nganaṉa nguḻu wiya nyinapai, panya Godalulanya aṯunytju kanyini manta urinyangka, munu puḻi murpu puḻka tjuṯa kaṯakatira uṟungka tjarpanyangka. Munula uṟu wiṯatjara waḻpatjara kuḻu puḻkaṟa rurkunnyangka nganaṉa nguḻu wiyaṯu nyinapai.
4Palu ngura wiṟunya nyaratja ngaṟanyi Jerusalemanya aṉangu tjuṯa pukuḻpa nyinanytjaku ngura karu uṟu wiṟutjarangka. Ngura nyara palula panya Godanya nyinapai. Paluṟu mayatja puḻka mulapa uwankarangka waintarinytja.
5Ka kutjupangku puṯu wiyaṉi ngura nyara palunya, panya Godanya nyinanyi nyara palula, munu paluṟu tiṯutjarangku aṯunymankupai palumpa walytja tjuṯa.
6Ngura kutjupangka kutjupangka tjanayanku pikangku punganyi, munu aṉangu kutjupa tjuṯa nguḻutjingaṉi. Palu Godalu mirara wangkanyangka manta kaṯakatira minya-minyaringkuku.
7Mayatjanya puḻka mulapa nganaṉala tjungu nyinanyi. Paluṟu nganampa tjamu Jacobaku mayatja, munulanya aṯunymaṟa kanyilpai.
8Pitjalaya nyawa Mayatja Godalu palyantja puḻka mulapa manta winkingka.
9Paluṟu ngura winkingka pikangku pungkunyangka pilunmankupai, munu kuḻaṯa tjuṯa kaṯantaṟa wiyalpai, munu waṟungka kutjalpai kuṯitji tjuṯa.
10Munu paluṟu wangkapai, “Wiyariwaya munu pilunarira kulila ngayunya, panya ngayulu kutju God Mayatja Puḻkanya uwankarangka waintarinytja manta winkingka.”
11Uwa, God Mayatja Puḻkanya nganaṉala tjungu nyinanyi. Paluṟu nganampa tjamu Jacobaku mayatja, munulanya aṯunymaṟa kanyilpai.
