SALMOS 35:5-26

⁵Quen se ajacatl quihuica tlasoli, itequihua TOTECO ma quintojtocatiyas catli nechcualancaitaj.

⁶Ma onca tzintlayohuilotl ipan iniojhui. Ma tlaxixitlacas campa nemij para ma huetzica, huan itequihua Toteco ma quintepotztocatiyas para quinmictis.

⁷Pampa masque amo tleno nijchijtoya, quitlalijque se tlaquetztli para nechmasiltise. Quixajque se ostotl para ipan ma nihuetzi.

⁸Ma quintlatocajsi se hueyi tequipacholi. Ma masica ipan nopa tlaquetztli catli inijuanti quitlalijque huan ma motzontlamiltica.

⁹Huajca quena, na nipaquis ipan TOTECO. Nijpiyas paquilistli pampa TOTECO nechmaquixtijtos.

¹⁰Ica nochi noyolo niquijtos: “Amo aqui seyoc quen ta, TOTECO. Tiquinmocuitlahuía catli amo quipiyaj fuerza para masehualme catli tetique amo huelis quinajsise. Quena, tiquinmanahuía catli teicneltzitzi huan catli amo quipiyaj catli quinmonequilía. Tiquinmanahuía ininmaco catli quinequij quintlacuijcuilise.”

¹¹Motlananaj masehualme catli amo cuajcualme huan nechcualancaitaj. Inijuanti tlatestigojquetzaj catli amo neli, huan nechtlaijilhuíaj ica tlamantli catli amo nijmati.

¹²Nechtlaxtlahuíaj ica catli amo cuali, masque nelcuali niquinchihuilijtoc. San quinequij nechtequipacholmacase.

¹³Pero quema inijuanti mococojque, nimotequipacho ininhuaya huan nimoyoyonti ica nopa fiero yoyomitl para nochi quimatise nimotequipachohuayaya ininhuaya. Hasta nimosajqui por inijuanti para nijtlajtlanis TOTECO ma quinchicahua. Pero TOTECO amo quicajqui catli niquilhui.

¹⁴Nimotequipachojtinemiyaya quen se tlamantli fiero ipantitosquía se nohuampox o se noicni. Nimotequipacho huan nichocatinemiyaya quen mictosquía nonana.

¹⁵Pero quema na nechajsic tequipacholi, inijuanti pajque. Quema nimotepotlami huan nihuetzqui, inijuanti mosentilijque huan nechhuetzquilijque. Masehualme catli amo cuajcualme huan catli nechiximatiyayaj nechejelnamiquiyayaj huan nechmaquiliyayaj masque amo tleno nijchijtoya.

¹⁶Quen masehualme catli amo cuajcualme quihuetzquilíaj tlen hueli, inijuanti noca pajque huan motlancochhuehuechotzque noixpa ica cualantli.

¹⁷TOTECO, ¿hasta quema noja san tijtlachilijtos nochi ni tlamantli? Techmanahui para amo nechmictise, pampa san setzi nonemilis. Techmaquixti tlen ni masehualme catli mochihuaj quen tecuanime catli quinequij nechhuejhuelose.

¹⁸Huan nimitztlascamatis tlamiyacapa ipan tlasentilistli. Iniixpa nochi nopa miyaqui momasehualhua nimitzpaquilismacas.

¹⁹Amo xiquincahuili nocualancaitacahua catli istlacatij ma noca paquica. Amo xiquincahuili catli nechcualancaitaj ma moixijcopilica ica paquilistli noixpa pampa nimotequipachohua.

²⁰Inijuanti amo tenotzaj ica cuali. San moilhuíaj quenicatza huelis quincajcayahuase masehualme catli itztoque ica yejyectzi ipan ni tlali.

²¹Nechtlaijilhuíaj huan quiijtohuaj: “¡Xiquitaca tijnelitztoque catli fiero quichijqui!”

²²TOTECO, ta tiquitztoc catli quichihuaj. Amo san xiitzto huan amo tleno tijchihuas. ¡Amo techtlahuelcahua!

²³Ximotlanana huan techchihuili catli xitlahuac huan melahuac. Quena, TOTECO, xiisihui huan techmanahuiqui.

²⁴TinoTeco Dios, ta catli ipa titetlajtolsencahua xitlahuac, xitenextili para amo tleno nijchijtoc. Amo xiquincahuili nocualancaitacahua ma noca huetzcaca.

²⁵Ma amo nopanti catli inijuanti quinequij. Ma amo quiijtoca nechixpolojtoque. Amo xiquincahuili ma moilhuica para inijuanti nechtlantoque.

²⁶Xijchihua para inijuanti catli noca paquij por notequipachol ma mocuapoloca huan ma ayacmo quimatica tlaque quichihuase. Quena, xijcahua para inijuanti catli moilhuíaj para más huejhueyi que na ma mopinahualtica huan ayacmo aqui ma quintlepanitas.