SAM 35:5-26

⁵Buyambam tapa, gatane angelakata wai aminu yanikwasiwan andatakunong. Unzing got takngata zongatane dapandapa puyapan kukaing binga.

⁶Gatane angelakata ayawamban kunong. Yawamban kuwawa itane kepiapana tasiwan zikaa siwan saweknga siyok.

⁷Nata gutonga takngatu iatang dua tasikum. Siwan ngana ita yapapna na tasiwan maiwitde takusopukaing. Siwan gapma dakatu nata pimake pukuwitde kwaiking.

⁸Siwan tapduu gwendune dua nataawa apasiwan mainanga akngata papsok. Siwan yapapna na tapikge teking gwenu gata tasiwi ina papsok. Gatu gapma kwaiking dakaatang kaa ina pimake pukunong.

⁹Buyambam tapata unzing gatangaman kakengu musipmaatangu apbakngawit. Ngan, ita na tapan take yuat takngae natake nata musip gwaang natangamit.

¹⁰Natangamuke banip gwaang wamu anzing yawit, “Buyambam tapa, ga binga tapatu dua yuak. Siwan gata kekekngana wena aminu take siknga gatayamunggayak. Unzing tasiwi aminu kekekngana kayata waaminu dua pasiwan maining.”

¹¹Sike kem aminda nae wai takngatu dua tasikum ngana kumzang temanggaganupa nanikaing.

¹²Sike natanu waaminde takeakngakan tasiyamunggat. Siwan ngana yake itanu waiaknga nae tasikaing. Unzing tasiwan kake musipmaatangu meya siknga nataat.

¹³Siwan ngana nata yake waaminde unzing dua tasinggat. Wena siknga. Tapduu gwenduine waaminu mait siwawa kake butaya siknga asinggan nataat. Natake butaya tauksan tamaggat. Butaya natake nanam tomda yuwa waakngata meya namunggak. Siwan nata tumuk wam yawa ngana gata dua gatayamukuyak.

¹⁴Dua gatayami kake nata waaminde butaya notnaapae ba paana ba uyapnae nataaing binga natayamunggat. Sike nata kepi sukuke aminu tapatuta mingae akupan butaya natake kwanam sikgak binga nataat. Nata musipmane meya siknga natake kwanam sikgak binga natayuat.

¹⁵Siwan ngana nata meya pakum tapduk gwekatangu waaminu unekan yuke apbakngaking. Na dua natawa waaminda unekan yuke nae uman yaitakepnangge yaking. Aminu kundu nata dua kaatda nae wamu atemapa yake yuatakaknga wena naniking.

¹⁶Sike waaminda masa wamu kumzang nanike nae meya namuking. Ngan, waaminda masa wam siknga nanike nae apbitake nomna zipbutnanga siking.

¹⁷Buyambam tapa, unzing tasiwa tapduu datdasing kapeya? Gata na tapi waaminda na dua tasiwan maiwit. Waaminu kaap zongu laionda kaapna yasiwan kupan nanggak binga tasike na nutapan kupitde tasikaing. Unzingge na gata ie kataune sandeke tapso.

¹⁸Gata unzing tasiwinu nata gae gaak kaknga dongu inata inata apu unekan yutningune yawit. Siakande siknga. Nata gatane umanda aknga aminbamde banakan yuke yatangenawit.

¹⁹Sike aminu kunduta nae iwana yumdekan sikaing. Gata ma kapewi bakngake na naitakepning. Nae musip maiu yumdekan natangamukaing. Unzingge gata dua kapewi meya nata papitde baknganing.

²⁰Sike gatu wamu kundusim paa nomanu takngatu notnaapaat katak yutnangge dua yakaing. Pout tasike wamu kundu yakaingu aminu nomanu kem wam yanike pasiwan mainingge yakaing.

²¹Gatu waamindakan wamu akaapmapa anzing temapa nanikaing, “Siakande siknga. Ninda akganduatna waiaknga tasikuyak,” ngang nanikaing.

²²Siwan ngana Buyambam tapa, gata waaminu gwa kaak. Unzingge genda ma umukusike yuwim. Buyambam tapa, gata na ma napmake keu maa komdune kuke yuwim.

²³Ga Anutu siwan natane Buyambam tapana. Gata enake apu na gatangamuyo. Enake wamu nata yanggau yakapmake papi kekekanong.

²⁴Anutu, Buyambam tapana, gata noman takngakan tasinggayak. Gata gatangami iwanata aminu waapa noman takngakan tawanggaunin ngang natdetning. Gata dua kapewi nata maiwa nanduke baknganing.

²⁵Gata dua kapewi wamu inae anzingu yaning, “Take siknga, sanga ninda tasinangge natamangu gwa tasina buya unin asaakgak,” ngangun. Gata dua kapewi anzingu yaning, “Ninda waapa gwa tasina mainggak,” ngangun.

²⁶Sike aminu wa meya nata kaatdenu apbakngakaing aminde gata pasiwi apmaakawa natdetdetna panggutokayo. Sike waaminda inane umana aknga yapangenakaingu wa na tasiwan maiwikge. Unzingge gata pasiwi umana wena akwak dakngake apmaakanong.