Salmos 32:2-11

²¡Ba neza zrente̱ naca na chee̱ bénnea' Dios quebe dxusebague̱' le̱' zria, bénnea' quebe dxezí xe̱'e̱!

³Gate quebe guxrúale̱pa' dul-la gubaga', bedú lazra' lawe' da gudxezra' bedú zra.

⁴Te zra ne chizrela bdeu' neda' xel-la' zi', Xran. Bedú lazra' ca dxebizre beaj nisa beu' la.

⁵Nadxa guxrúale̱pa' dul-la gubaga', ne quebe bcacha' zria da guzúa chia'. Bechugu lazra' guxrúale̱pa' na lau Lue', Xran, na' Lue' bnite lau' chee̱ dul-la gubaga'.

⁶Xúgute̱ bénneache chiu' dxal-la' xuluchálajle̱ne̱' Lue' gate de̱ lataj xelexezrelne̱' Lue', na' gate zrin da zi' da xa' da xelezaque̱', da gaca na ca tu xe̱gu nisa zren da dxedxuaj na, na' quebe bi gune na benne' ca'.

⁷Lue' nacu' ca tu lataj naga gaca gucache cuina', na' gucache chawu' neda' chee̱ quebe bi da saca'. Tu gul-lazqueza' zizraj ca bseláu' neda' lawe' da dxuxú' neda'.

⁸Dxenná Xránadxu: “Gulé'eda' lue' neza naga dxal-la' tau'. Gusé̱deda' lue', ne guzéajni'ida' lue' ca dxal-la' gunu'.

⁹Quebe gacu' ca tu bzrina' u tu bea, be̱ quebe bi dxeléajni'iba', bea ca' dxun na ba xen nna be'enu'-ba', na' cu'u xia dxú'aba', chee̱ gunu' xelunba' ca dxaca lazru'.”

¹⁰Benne' we̱n da cale̱la ca' dxun na ba xen xeledée̱' lu da zi' da xa'. Benne' ca' dxuluxrén lazre̱' Xránadxu, tu dxuxúezqueze̱' le̱' nen dute̱ xel-la' zri'i lazre' chee̱'.

¹¹Le'e, benne' xrlátaje, le be, ne le sua lu da ba neza, ne̱ chee̱ da be̱n Xránadxu, gúcale̱ne̱' le'e. Nen dute̱ xel-la' dxebé le gul-la, le'e, nácale li lazre' lau Le̱'.