Sam keil 32:2-11

²Sien hel en koakeil Ahi Asuv roselus kattei keil ven sakkalkalien one, en koakeil luvosien tovuol en keil.

³Munak narvit lattei sakkalkalien onak, namurang lisenges ka avek mai memerau veni.

⁴Meneai ka vongien, kosan mahien minau. Keihoen onak vuol ranau varei, suval tilep vuol ka memes navong meteiai mutin keih.

⁵Sakini, navit lat tisaen keil onak minuk Ahi. Sakkalkalien keil onak koa namum suai eni, nirmumontei mun. Ka narendemi navit mahit lat tisaen keil onak minuk, ka keik, kokulat keil ranau, ka methos onom hel eris enau.

⁶Hesakini, koakeil amusiluk ihis venuk en avong takeih keil. Ka navong mahien hehi houlu hemai hehit vatahin koe keil, hesakras vasut keil.

⁷Keik kovi out tatokusien onak, kikur koe nau en avong takeih. Nisau masmasuk houlu mok, ven koa koring koe moulien onak.

⁸Evus, Ahi Asuv mul viteni vit, “Nihiseinuk en sise koa mal kovousili. Nisan rendemien tahos minuk.

⁹Sakini konoumontei vatkeih onom nasuval hos tai, koa aling aean tai en ongon vasakini vamah ka voual vamal en sise.”

¹⁰?Milesi? Meatin keil amum kalkali, mahien hehi houlu hemai en keil, ka koakeil aling desien one en Ahi, envatien onen mul kav koe keil.

¹¹Kami koa mimum mal en meten Ahi, mihelonge hetahos ka mihevut kami. !Kami koa milong kati, mihehisohiso en sien!