SALAMO 32:2-11

²Bema Lohiabada ese tau ta kerere totona ia samania lasi, bona unai tau ena lauma lalonai koikoi sisina ia noho lasi, unai tau be mai moale danu.

³Bema egu kara dika lau gwauraia hedinarai lasi neganai, lauegu tauanina ia maragi lao, dina ibounai lau taitai dainai.

⁴Badina be dina bona hanuaboi ibounai, oi Lohiabada ese lau oi matakani henia noho. Lauegu goada be ia ore ia lao, siahu neganai ranu be ia kororo lao bamona.

⁵Unai neganai lauegu kara dika, be oi dekenai lau gwauraia hedinarai. Lauegu kerere lau hunia lasi. Lau gwau, “Lauegu kerere, be Lohiabada ena vairanai do lau gwauraia hedinarai,” vadaeni oi ese lauegu kara dika oi gwauatao.

⁶Unai dainai nega dikadia neganai, Dirava ena taudia ese, oi dekenai do idia guriguri be namo. Vadaeni hisihisi be abata bamona do idia toreisi, to oi dekenai idia abidadama taudia dekenai, unai dika do ia ginidae lasi.

⁷Oi be lauegu hunia gabuna, Oi ese dika dekena amo lau do oi hamauria. Oiemu hamauria dainai ane dekenai oi do lau hanamoa, badina be oi ese lau oi gimaia noho.

⁸Lohiabada ia gwau, “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.

⁹Hosi o doniki edia kara bamona do umui karaia lasi. Idia be mai edia diba lasi, to taunimanima ese edia uduna dekenai auri idia atoa, do idia manada totona, taunimanima edia ura do idia karaia lasi garina.”

¹⁰Kara dika taudia edia hisihisi be momo, to Lohiabada dekenai idia abidadama taudia, be Dirava ena lalokau, ia doko lasi lalokauna ese, idia do ia gimaia bona naria noho.

¹¹Kara maoromaoro taudia e, do umui moale! Lohiabada ena kara dainai do umui moale! Lohiabada umui kamonai henia taudia e, mai moale bada danu do umui boiboi.