SALMOS 2:1-9

¹Se huihuiyot para tanahuatiani huan inimasehualhua cati amo quiixmatij TOTECO motananase iixpa. San tapic para mocualtalise quichihuase ten fiero.

²Tanahuatiani huan tayacanca tequichihuani ipan taltipacti mosisinise, huan mocamanalhuise taya huelis quichihuilise TOTECO huan nopa Tanahuatijquet Cati Yaya Quitapejpenijtoc.

³Tahuejchihuase huan moilhuise: “Ma timoquixtilica nopa tepos cadena cati ica techilpitoc. Ma timomanahuica para ayecmo huelis technahuatis TOTECO.”

⁴Pero Toteco cati itztoc nepa ilhuicac huan quinahuatía nochi, san quinhuetzquilis. Quena, san ininca paquis, pampa iixpa ya amo teno ipati cati inijuanti quipilsencahuase.

⁵Teipa quema quiyolaxitise TOTECO, melahuac quinixcoilhuis. Huan ica miyac cualanti quinmajmatis huan quiijtos:

⁶“Ya nijtalijtoc notanahuatijca para tanahuatis ipan altepet Jerusalén. Yaya mosehuis ipan isiyaj cuajcualtzi nepa ipan notepe tatzejtzeloltic cati itoca Sion.”

⁷Huan cati TOTECO quitapejpenijtoc para itanahuatijca quiijtos: Nitayolmelahuas cati TOTECO nechilhuijtoc huan ya ni cati quiijto: “Ta tiTanahuatijquet, tiNocone. Ama nitayolmelahua miyacapa para na nimoTata.

⁸Techtajtani huan nimitzmacas nochi talme huan inimasehualhua para moaxcahua. Quena, tijselis hasta nochi taltipacti para moaxca.

⁹Xiquinnahuati chicahuac quej se tanahuatijquet cati tanahuatía ica teposti imaco para ica tetatzacuiltis. Quena, xiquinomiyopojpostequi mosisinijca masehualme quej elisquíaj soqui chachapalme.” (Quej nopa TOTECO quitequimacac itanahuatijca ma quichihua.)