Samu 2:1-9

¹Akipamo yuu muu dupwana wambu dupwame Kamongopa sisu nyuo karo yulu koo lapo pinya lao suu pyao rapa rapa piminyipape angi kapa pii nalyamisi?

²Nakamana kiŋi dupwa porai ingyuo karo dee akali mupwa dupwa wato lao karapala Kamongope banya rombo palyisi kiŋi dokope yanda pimwailyaminyi.

³Nakambame namwa isilyambinyi doko iso kara nanale ramanyi nembamana, letaminyi.

⁴Kamongome yake panda banya kiŋinya petenge isa dokona piso nakama kopyali ingyuo pimana lao karaminyi dupwa kandapala giyalya giyana pingi.

⁵Baame nakama imbu singi paleta repe repe pii lamaiyuo dokopa nakama pakanya pyambuo lao,

⁶Nambana yuu kyau poo pyasi Sayone lenge dokona nambame nambana kiŋi doko rombo palyuo karena lamaipu, letamo.

⁷Kiŋi dokome lao, Kamongo dokome lapyamo pii dupwa nambame polo larole. Baame namba langyuo, Emba nambana ikinyingiŋi. Epapu dakepa namba embena rakange ingyuo karoŋo.

⁸Piso serene dokopa yuu muu dupwa emba jeronopa peparae embena ingyuo para.

⁹Embame ane pangalimi pyao kambo dee nakama pee warame wasisi pyao kambele lao piri, lapya letamo.