SALMOS 27:2-13

²Quema amo cuajcualme quinequise nechtehuise huan quinequise nechmictise, motepotanise huan huetzise.

³Masque nochi isoldados se hueyi tali motananase noixpa, amo niyolmajmahuis. Masque nechtehuise, na nimotemachijtos ipan TOTECO pampa yaya itztoc nohuaya.

⁴San se tamanti nijtajtanijtoc TOTECO. San se tamanti nijnequi. Nijnequi niitztos ipan ichaj TOTECO nochi tonali. Nijnequi nijhueyichihuas nepa huan nimopaquilismacas ica nochi ihueyitilis huan itatanex. Quena, ipan ichaj nijtemos cati ya ipaquilis.

⁵Quema ajsis tonali cati amo cuali, TOTECO nechmocuitahuis. Nechtatis ipan itiopa campa más tatzejtzeloltic, huan teipa nechquetzas ipan se hueyi tet para nechhueyitalis.

⁶Quena, nechhueyitalis iniixpa nocualancaitacahua. Yeca na nijtencahuas tacajcahualisti ipan itiopa, huan nicuatzajtzis ica paquilisti. Nihuicas huan nitatzotzonas para nijpaquilismacas TOTECO.

⁷TOTECO, techtacaquili pampa nimitznojnotza. Xijpiya hueyi moyolo ica na, huan technanquili.

⁸TOTECO, quema techilhuía: “Techcamanalhuiqui”, na nimitznanquilía: “Nimitzcamanalhuiti”.

⁹¡Amo techcuanecatatili! ¡Amo techhuejcamajcahua pampa ticualantoc ica na! San ta cati techpalehuía, noTeco Dios, ta cati tinotemaquixtijca. Amo techiyocacahua, yon amo techcajtehua noselti.

¹⁰Masque notata huan nonana nechtahuelcahuase, TOTECO, ta nochipa techmocuitahuis.

¹¹TOTECO, technextili cati tijnequi ma nijchihua. Techyacana san ipan nopa ojti cati cuali campa tijnequi ma ninejnemi, pampa nocualancaitacahua nechyahualojtoque.

¹²Amo techtemactili inimaco quej inijuanti quinequij, pampa ica na motanantoque masehualme cati istacatij huan san quimatij cati más fiero nechchihuilise.

¹³Pero na cuali nijmati TOTECO nechmanahuis, huan sempa niquitas quenicatza cuali iyolo ica na ipan ni taltipacti campa niitztoc.