Psalms 27:2-13

²Kariimet memek aga momon maguwumonko taimon mu, nongota dagulomon memek tamonko.

³Kager motam biya taimon ale aga laturmon, bare ani me ta nguangarikko; kager kari taimon agarak kagermon ta wore ani am gek kiriyam bagarikko.

⁴Ani Yawe mel suanta ko isuem mu iwita: ani noko temple ningi pempem la ilak baga se, noko melmasak duap duap kumik nikim ningi mu ari se, amotam welang tai se, ko ikia to se lagarikko.

⁵Se ikup kam ningi mu nu ko kuting bowa ningi aga kaluwurok, ale duruk bo noko duruk Zion iwita te aga bitiruk se ningo la bagarikko.

⁶Se kari memek aga momon maguwumonko mu, aliti biya bagamon se ani kualala Yawe ko temple ningi iwita baga se airik ale amilmil te wur yagowom gurugek ale tama bita Yawe tua iwita tuekko.

⁷O Yawe, airik mu agiring ikiko, gemang lila aisu ale aga guranek ikiko.

⁸Aninga angamang motam balso, nika kema motam arigekko; se Yawe, nika kema motam arigekko angamang aniso.

⁹Se ni kema motam ani ago ko me kaluwurko; gemang memek te ani ka ura kari me aga karoko, mu awuk, ni keta ani aga sangorsam. Ni biring me aisu ale me agarki daleluwurko, O Kaem, aninga Saonga Kari.

¹⁰Aninga nang ba ilak agarki daleluwumon, bare Yawe, ni aninga aru tagisam.

¹¹O Yawe, ni ka munan aga kasuruko, mu awuk, aninga bita maguwura ko kari suen biya bagasan; buta se nika lage diram mu te agarak namarko.

¹²Ni kari memek nungarkiwer se nunga ikia memek mu te me aga ilumonko; nuna ani aip te den kawel ninguru balsan ale aga bita maguwusan.

¹³Bare ani am ninguru ko iki saperem, Yawe ani ago ko ningo bitirukko mu ani amotam te arigekko.